النهاردة 6 اكتوبر

اليوم هو السادس من اكتوبر ، لقد مرت 37 عام على حرب اكتوبر المجيدة
لقد كنت انتظر ذكرى الحرب لاستمتع بإجازتى وانا استمع الى كوكتيل من الاغانى الوطنية التى تجعلنى اعيش الحرب اعيش حلاوة النصر .
ولكنى اليوم استيقظت من نومى على صدمة . لقد صُدمت حقا لقد صُدمت .
لقد سمعت احد اطفال عائلتى وهو يقول : " هو ايه اللى حصل يعنى فى 6 اكتوبر عشان ناخده اجازة ويقعدوا يهيصوا يا ماما هوه ايه اللى حصل فى الحرب دى بالظبط "
ليست كلماته هى فقط التى صدمتنى ولكن اجابة والدته قضت علىّ حيث قالت :" اسكت بقى يعنى هيكون ايه اللى حصل دى حرب" وسكت الطفل وقُتلت بداخله كل معانى تلك الحرب .
انها كارثة بمعنى الكلمة توضح ما وصلت اليه ثقافتنا وسياستنا وحالنا فى هذه البلد....... كدت ان ابكى ولكنى تماسكت والتمست الاعذار للطفل وامه ؛ فامه ليست المسئولة وحدها عن هذا.
فالكثير من الاطفال والنشأ وبراعم ذلك الوطن لا يعرفون كم من دماء نزفها ابناء مصر فى هذه الحرب ،لا يعرفون اى شئ عن نصر اكتوبر لا يعرفون معنى النصر ولا حلاوته .
ألا يستمعون الى اغانى عبد الحليم حافظ وشادية وغيرها من الاغانى الوطنية الجميلة!؟.
(( عاش ليكى اسمك عاش عاش عاش عاش اللى حبك عاش عاش عاش ))
ألا يعرفون اشعار صلاح جاهين وغيره من الشعراء


أكتـوبـر

مـن غيـر مـا نتفـاخــــر ونتبــاهـى

لا بـالـــــــرايـات اللـى رفعنـاهـا

ولا بـالحصـــون اللـى انتـــزعنـاهـا

ولا بـالـــدروع اللـى مــــزعنـاهـا

ولا بـالــــدمــوع اللـى ابتلعنـــاهـا

علـى الضنــى الغــالـى وحجبنـــاهـا

وحيـاة عيـون مصــــر اللـى نهـواهـا

واكتـوبــر اللـى كمـا النشــور جـاهـا

بـلاش نعيــد فـى ذنـــوب عملنــاهـا





أنـا اتعـس اللـى بـــدعهـا وجنــاهـا

ومـازلـت تحـت عقـــابهـا وجــزاهـا

وحيـــاة ليـالـى ســود صبــرنـاهـا

واتبــددت بالشمـــــس وضــحـاهـا

نكبــح جمـــاح الـزهـــو ، مـع أنـه

مـن حقنـــا ، ونحمـى النفـــوس منـه

ولـو " العبــور " سـالـونـا يـوم عنــه

قـول : مجـرد خطـــــوة خـدنـاهـا !

نعم انها مجرد خطوة خدناها

فهم لا يعرفون لذا لم يستطيعوا الحفاظ على تلك الخطوة
لقد حكى لى أبى عن حرب اكتوبر وعما حدث فى سيناء رغم انه لم يكن هناك على جبهة القتال . فقد حكى لى ايضا عن اصدقاءه الشهداء وغيرهم . ولكن ما وجدته بعد مرور اكثر من ثلاثين عام هو ان ذكرى حرب اكتوبر تتلاشى من نفوس وقلوب المصريين . صارت ذكرى تُغنى فقط ولكن لا تُعاش ..... يا خسارة . ربما اكون مخطئة ولكن هذا ما شعرت به . ولكنى ايضا اعرف ان كثيرون مثلى مازال لديهم امل فى تغيير ذلك الوضع المؤسف . لذلك فأنا لم ادع الطفل هكذا بل قمت انا الاخرى بدورى كأحد اقاربه وحدثته عن حرب اكتوبر كثيرا وتحدثنا طويلا كاننى لم اتحدث من قبل. وسعدت بحديثى معه عن الحرب ولكن ما اسعدنى حقا هو ما لمحته من لهفة فى عينيه وانا احكى له وكنت فى قمة سعادتىعندما شارك كل اقاربى من حولى حتى والدة الطفل فى الحديث عن ذكرى نصر اكتوبر. لقد كان حديث ممتع استفدت منه واستمتعت به .

ردك يا احمد يا شعبان فكرني بالناس دي .. اللي يقوله 6 اكتوبر مدينه جميله !!! واللي يقوله دا عيد ميلادي !!! واللي يقوله فيها عمارات حلوه !!
اتفرج علي الفيديو وشوف مدي الهبل اللي بقينا فيه ....

علي فكره انا لما شفت الفيديو ده انا مكنتش مصدق اني في ناس كده ....بس لما شفت رد هيرو افتكرت الفيديو لانه فكرني بالبنت اللذيذه اللي لما المذيع بيسألها عن اكتوبر ومعناها ايه بتقوله معناها اجازه .. بجد يوم 6 اكتوبر ده لازم يبقي درس بيعلمه الاباء لاولادهم كل يوم مش بس في 6 اكتوبر .. وانا الحمد لله والدي كان ليه الشرف انه من اللي حاربوا في سته اكتوبر ومعتقدش انه بيمر فتره الا لما يحكيلي عن حرب اكتوبر ودا اللي لازم نعلمه لاولادنا .. مش البنت اللي في اخر الفيديو اللي بتقولك مصر مفيهاش رجاله .. ليه انتي كنت بتدوري في علبه تونه

معلش بس عندى كلمتين كده خانقينى قوى وكله بسبب الفيديو المصطنع اللى موجود واللى اكيد وراه قناه on tv واللى كل همها اظهار هبل المواطن المصرى و مش عارف ليه اوقات تلاقى برامج هادفه ومفيده واوقات برامج مالهاش لازمه لانها خلاص متكرره كتير ومنها البرنامج اللى فيه واحد بيقلد محمود سعد كتقديم ومفيش وراه الا يعلى صوته ويزعئ وخلاص وفى الاخر برده مابيغيرش حاجه وبنت تانيه رفيعه كده كل اللى بتعمله انها تنتقد واحد جامد جدا وتحس انها على حق ولما الشخص اللى بتنتقده يدخل معاها فى مداخله ترجع فى كلامها وتكش وتقولك الله واعلم ولا الاستاذ ابراهيم عيسى مقدم برنامج اسمه ماينفعش خالص وتلاقيه حضرتك بيقول الاسم بكل ارتياحيه انا نفسى اعرف ايه اللىكان هيحصل لو احترمنا كمشاهدين وقدم اسم محترم وبرنامج مضمونه محترم لكن الصراحه كان المعظم اسفاف الا بعض الاستثنائات وقال ايه يامحترم لقيته مره بيقدم برنامج اسمه الفاروق وعامل نفسه الشيخه خضرا ومش عارف ليه الناس وخداه زعيم سياسى مع انه كتير بيعمل حاجات بتتاخد عليه ونختم باقى الاستفزازات بالندابه عمرو اديب اللى ماشاء الله بيصوت زى العرسه لمجرد خساره اللزمالك والله فعلا اتخنقت لان دلوقتى مافيش قنوات محترمه تقدر تصدق ان هدفها مصلحتك واضيف كمان مفيش القدوه و ان الله حليم ستار ومعلش ان كنت طولت عليكم