ايه ده ايه ده ايه يا مصطفى الداخلية باعت البلد وانت اللى كنت بتحميها؟؟ امال انا كنت فين فى مارينا!!ههههههههههههههههههههههههههه
بجد بجد بجد يا جماعه انا عاي اوجه تحية فخر واعزاز للشعب المصرى اللى انا واحد منه طبعا عل الثورة اللى قام بيها وخصوصا الشباب اللى كتير كان بيتقال عليهم عيال و مش بيتحملوا مسئولية, هما دول الشباب اللى غيروا تاريخ مصر للأبد ان شاء الله
انا كمان نزلت الشارع , اكيد لما بيان التنحى اتقال انا كنت فى الطريق الى مقر وحدتى فى الجيش لأنه ماكنش ينفع اتأخر لكن انا نزلت الشارع لما وصلت النهارده , ومش اى شار ع , انا نزلت الشارع اللى قامت منه الثورة , ميدان التحرير , وقفت فى المكان اللى ماتت فيه الشهداء وتعالت منه صيحات الغضب اللى كان نفسى اكون واحد من مطلقيها , وقفت فى مكان حسيت فيه بالحرية والنضج , بجد انا فخور جدا جدا جدا بإنتمائى لهذا الشعب
حاجة كمان عجبتنى انى اول ما نزلت الميدان لقيت واحد جاى عايز يتصور معايا ( بما انى كنت لابس ميرى يعنى ) وقعد يمدح فى الجيش وازاى وقف جنب الشعب وقاللى "مفيش شعب بيحب الجيش زى مصر" بس انا رديت عليه وقلت" مفيش جيش بيحب الشعب زى مصر" ودى حقيقه فعلا , انا مش قادر اوصفلكم اد ايه انا كنت بتابع انا وزمايلى بشغف اللى بيحصل فى مصر واحنا ماسكين السلاح وواقفين ندافع عن بلدنا , يمكن ماسعفناش الحظ اننا ننزل الشارع نأمن الناس , بس احنا كنا فعلا بنتدرب تدريب قوى جدا علشان نحمى مصر من عدونا اللدود اللى كان واقف ع الحدود,كانت كل طلقة بتخرج من سلاحى كانها رايحة فى قلب واحد من الفاسدين اللى دمروا البلد او واحد من الاعداء المتربصين, كنا فعلا بنغنى اغانى وطنيه على طول وبندعى ان ربنا ينصر اللى فى ميدان التحرير والحمد ربنا استجاب لدعواتنا جميعا
انا فعلا فخور بإنتمائى للجيش المصرى العظيم اللى اثبت انه جزء لا يتجزأ من الشعب وصوته مع صوت الشعب دائما , وأنا بأتبرأ من كل ضابط داخلية هرب وساب مكانه وفتح باب لمسجون , بجد البلد بريئة منهم
وتحية من القوات المسلحة الى كل شهيد ضحى بروحه من اجل هذا الوطن العظيم , واسف على الاطاله بس انا بجد كان نفسى اتكلم واعبر عن فرحتى
العمل/الترفيه
المزاج
