ياريت مصر كانت ميكروباص

الناس في الميكروباص كل واحد فيهم عارف هوه المفروض يعمل ايه بالظبط من غير ما حد يقوله، من أول ما الناس تركب الميكروباص وهوه واقف يحمل (محطه واحد محطه) والست اللي شايله شيله كبيرة والشاب اللي قاعد في الميكروباص يقولها عنك يا حاجه ويشيل عنها حاجاتها وهيه داخله الميكروباص وتقوله ربنا يكرمك يا ابني، والراجل اللي يييجي يسال الركاب من علي باب الميكروباص محطه دي، أه محطه أن شاء الله اركب يا حاج، والبنت اللي تيجي علي الأخر محطه يا أنسه طيب في مكان قدام، ويركب السواق ويطلع بالميكرواص، الناس تبدأ تلقائيا في لم الأجره، تلقائيا فيه واحد يلم الأجره من كل صف وبعدين الأجره تطلع قدام لغاية ما توصل لواحد قدام يلم أجرة العربيه كلها ولازم يبص يلاقي الناس ادوله 10 بس وهوه يبقي 11 نفر كده ناقص واحد ( فيه حد ما دفعش ورا يا جماعه).

الناس تبص تلاقي ولد صغير حالته صعبه من أطفال الشوارع مش بيتكلم فيه راجل في الأربعينات كده يطلع اجرة نفر ويديها للراجل ويقوله اتفضل أجرة الولد، فيه ناس بقه عايزه الباقي ومش معاها فكه (ما حدش معاه فكة خمسه ) واحد يطلع الفلوس من جيبه ويدور (ماشي فكه خمسه اهيه أتفضل) وبعد شويه طيب ما حدش معاه نصين وبنفس الطريقه واحد يطلع نصين، (ماشي يا أسطي العربه كلها أهيه) السواق ياخد الفلوس يعدها بأيده الشمال في نفس الوقت اللي بيشرب فيه الشاي بأيده اليمين والسوجاره في بقه ورجليه علي البنزين والفرامل والدبرياج وودنه مع الركاب اللي في الميكروباص ورا عشان لو حد عايز ينزل ( علي جنب يا أسطي) وطبعا بيسوق العربيه مع أن كل أطرافه وحواسه مشغوله بحاجات تانيه ده طبعا غير مهامه التانيه في الهروب وتفادي اللجان اللي في طريقه وتزبيط عسكري المرور واخيرا تزبيط المواضيع مع أمين الشرطه لو حصل ووقع في لجنه لأن طبعا السواق رخصته منتهيه أو معهوش رخصه أصلا أو رخصة العربيه منتهيه أو طبعا ماشي في خط سير غير خطه حتي لو كل ده سليم برضه فيه مشكله وخلاص في اللجنه، سواق الميكروباص عارف أن عليه مهام كتير جدا مش مجرد انك بتعرف تسوق تبقي سواق ميكروباص أو حتي لمجرد أن معاك الرخصه تبقي سواق ميكروباص لأن سواق الميكروباص أكتر من كده بكتير سواق الميكروباص بيعرف امتي يسوق وامتي يسيب مكانه،كل واحد في الميكروباص عارف هوه بيعمل ايه بالظبط، اللي قاعد جمب السواق لازم يبعد رجليه عن الفتيس وياخد الفلوس من الركاب اللي ورا يديها للسواق، واللي قاعد جمب باب الميكروباص يفتح الباب لكل اللي عايز ينزل، لما واحد من الناس اللي قاعدين في الكنبه اللي ورا في الميكروباص يحب ينزل الناس اللي قاعده في الكراسي اللي بتتفتح وتتقفل اللي في يمين الميكروباص بينزلوا من العربيه بكل بساطه لأنهم عارفين همه المفروض يعملوا إيه ومع ذلك تسمع كلام بقه من نوع خليك والله ما إنت قايم خليك مستريح، ولماحد بيقعد برضه علي الكراسي دي ويبص علي اللي قاعد وراه ويقوله الكرسي مضايقك ولا حاجه، حتي الحاجات الغبيه اللي بتحصل في الميكروباص، الواد اللي بيقف علي باب الميكروباص في الزحمه والناس بتركب عشان ينشل ولا يسرق، ولا اللي بيلم الأجره ويقوله علي جمب يا أسطي ويشمع الفتله وابقي قابلني لو عرفت تجيبه، أو العيل البارد اللي بيعاكس البنت اللي قاعده جنبه في الكنبه اللي ورا .

كل ده ما يقللش من المنظومه العبقريه الموجوده في الميكروباص، ليه الناس جوه الميكروباص غير بره الميكروباص، طب هوه يبقي من الغباء لو الواحد أتمني أن مصر تبقي ماشيه علي أربع عجلات.

زائر

اقتباس :: طب هوه يبقي من الغباء لو الواحد أتمني أن مصر تبقي ماشيه علي أربع عجلات.

لا مش غباء ولا حاجه بالعكس ياريت, كنا هنبقى غير كده خالص لو كل واحد فعلا عارف اللى ليه واللى عليه, مع ان التشبيه غريب او جديد بس الكلام منطقى فعلا ليه مصر ماتبقاش زى الميكروباص والله فكرة مبتكرة وكلام موزون, حقيقى موضوع يستحق الاشاده مرسى ليك وجزاك الله كل خير

» ميكروباص .. جهنم يا أسطي لو سمحت
» قصة مؤثرة جدااااااااااااااااااااا ياريت كلنا نقرءاها
» ياريت الكل يدخل ضرورى جدا
» اثمن ثلاث اوقات ف رمضان ؟ياريت نغتنم الفرصة؟
» الله يرحمها كانت كويسة ؟