الاهلي وبس !!!!

طبعا واكيد هنا في مصر مش هينفع يكون في فريق احسن من الاهلي ولا اي لاعيبه غير من عند الاهلي ولا جماهير غير جماهير الاهلي ولا مدربين غير مدربين النادي الاهلي .... واكيد اكيد الزمالك مش هياخد الدوري السنه دي ولا اللي بعدها ولا اللي بعدها ...
اولا وبعد المقدمه الغريبه دي ..جه اليوم اللي النادي الاهلي فرحان اوي اوي بالتعادل مع النادي الزمالك " نادي الانجليز " و جه اليوم اللي شيكابالا "الاسود" بيقف قدام جماهير الاهلي ... دي هزلت ....فعلا ازاي النادي الاهلي يتعادل مع نادي الزمالك وكل الظروف مهيأه للبطل الكبير ونادي القرن !!!! ليفوز بنص دسته اهداف ...
من غير الغاز نبدأ كلامنا مباشر علي طول .. اولا الامن يمنع جمهور الاهلي العظيم من دخول يافطات عنصريه ضد شيكابالا ... فعلا اثبت انه جمهور عنصري وهمجي ..
ومن اول دقيقه في المباراه شتيمه في شيكا وامه .. ده كلام برضه هو لسه في كده !!!
ثانيا البلطجه داخل الملعب من لاعبي الاهلي ضرب وخناقات وكأنها معركه حربيه واكيد طبعا عارفين قائدئ المليشيات الاهلويه اللواء احمد فتحي والعقيد شريف عبد الفضيل واخيرا موسيليني الكره المصريه وائل جمعه ... والحكم يوفر كل الحمايه للاعبي الاهلي ولكن الزمالك ولا كأنه شايف حاجه ...ضربه جزاء مش محسوبه حين قرر وائل موسيليني او سوري وائل جمعه ان اللي يدخل منطقه الجزاء هيقطعله التي شيرت وبالفعل اتجنن محمد ابراهيم الاعب الصغير وقرر ان يضع وائل جمعه في ظهره وحصلت الحادثه ولكن الامن مستتب !!! وتظهر اخلاقيات لاعبي الاهلي عندما يشترك سيد بيه معوض " بتاع الساحه هنا في الفيوم "مع لاعب الزمالك الصغير احمد غانم في الدقيقه 15 ويطبطب احمد غانم علي رأس سيد بيه معوض ولكن ازاي يطبطب عليه وبكل روح رياضيه يرفض سيد بيه هذا الفعل الشنيع واللي مش موجود عندهم في النادي الاهلي والحكم كان بيعمل مكالمه ومش فاضي !!!! وبعد شويه كده حضر اللواء احمد فتحي وقرر ان تقطع ارجل كل مثيري الشغب امثال شيكابالا ويبدأ بالتنفيذ العقيد شريف عبد الفضيل حينما رأي شيكابالا يثير الشغب داخل منطقه الجزاء يدخل عليه دخله لاعب مصارعه .. والله مصارعه بجد.. والحكم كان في المول بيجيب صفاره !!! ايضا بعدها يدخل لاعب الاهلي حماه الله وعفاه!!! في حسن مصطفي لاعب الزمالك علشان يبطله كوره والحكم يظهر هذه المره بقرار حاسم بانذار لاثنين !!! وحسام غالي احسن لاعب في المباراه مين اللي اختاره مش عارف يقوم بسلوك مش بنشوفه غير في كره الشوارع وهو بيعمل انه هيخبط الكره في وجه عمر جابر ولكن الحكم كان بيصلي العشاء !!!
وغيرها من المواقف الكثيره اوي منها مثلا الفاول اللي كان هيشوطه احمد فتحي ووائل بيه جمعه رايح يقف في الحائط بتاع الزمالك اه بتاع الزمالك ما دماغه خرسانه ورايح علشان الحائط يبقي قوي ويضرب عاشور الادهم والحكم يعطي الانذار لعاشور الادهم علشان لابس الفانله البيضه .... وحسام غالي يعرقل محمد عبد الشافي في الوقت بدل الضائع ولكن الحكم كان فاكر ان اللي ضربه زميله ابراهيم صلاح وبيديله انذار هههههههههههه
طيب سؤال اخير حد شاف الزمالك اخذ فاول واحد طوال الشوط الاول !!!! اتحدي
بعد المباراه يخرج علينا لاعب مش عارف جيبنه منين اسمه عفروتو اه والله اسمه عفروتو بيقول ايه عم عقروتو ده " ازاي ابو تريكه ينزل ايده في ايد شيكابالا ويروحوا يحييوا الجماهير ... مفيش مقارنه بين ابو تريكه وشيكابالا " صح عندك حق !!!!
وكأن شيكابالا مولود فوق رؤسهم ؟؟
ولكن في النهايه بنقول لجماهير الاهلي فعلا انتوا اثبتوا انكم جماهير مثاليه في كل شئ وان فعلا اتحاد الكره كان عارف ومتأكد ان الاهلي مش لازم يخسر المباراه دي لانها كانت هتنهي حياه ناس كتير والسوابق كتير.... دا انتوا كسرتوا صاله النادي بتاعكم .... كسروا كمان وكمان واتحاد الكوره مش شايف حاجه واشتموا كمان كمان والغرامه 10 جنيه فقط ....
وعلي فكره مش هينفع حد يكون علي الساحه غير الاهلي والقديس ابو تريكه واللي هيفكر غير كده يبقي اتجنن !!!