معاك لاخر العمر يا حبيبي

نؤيد سيادتك لفترة جديدة
نكمل خلالها المسيرة السعيدة
و بالمرة فيها نبيع الحديدة
مفيش حاجة تانية نبيعها خلاص
*****
نؤيد سيادتك لأجل المزيد
من اللي تحقق بفضلك أكيد
بقينا خلاص ع الحميد المجيد
و ربك لوحده ف ايده الخلاص
*****
نبايع سيادته ولا حد غيره
كفايا علينا نبرطع في خيره
و نوم شعب مصر العظيمة و شخيره
يقول للحرامي ما تسرق كمان
*****
نبايع سيادته وابنه وحفيده
مفيش زي فكره قديمه و جديده
خرابك يا مالطة حيحصل بايده
ومين فيكي يعني بيسمع آذان
*****
نبوس ايد سيادتك و رجلك كمان
تخليك معانا يا ريس عشان
وجودك ضرورة فرضها الزمان
و من غير وجودك حقيقي نضيع
*****
دي مصر بتاعتك و احنا ضيوفك
كفايا علينا يا ريس نشوفك
و عاذرين سيادتك و فاهمين ظروفك
عليك بس تأمر و احنا نطيع
*****
في جزمة سيادتك كلابك يبوسوا
و فوق الغلابة بجزمهم يدوسوا
و شعبك ليلاتي يا ريس غموسه
مذلة و مهانة و حوجة و مر
*****
لكن يعني ما دمنا شعب انتساب
و دايما وأبدا ف حالة غياب
متعملش لينا يا ريس حساب
دي عزبة سيادتك و فيها انت حر
*****
و دستور مدستورش مش فارقة خالص
كلام فاضي كله يا فندم بناقص
كفايا علينا الفساد اللي ماصص
عرقنا و معشش و ضارب جذوره
*****
و ايه يعني تهري جتتنا البلاوي
يوماتي كوارث فضايح رشاوي
كفايا علينا القعاد في القهاوي
بنستنى لما الوريث ييجي دوره

من موقع الحوار المتمدن

--------------------------------------------------------------------------------

لكن يعني ما دمنا شعب انتساب
و دايما وأبدا ف حالة غياب
متعملش لينا يا ريس حساب
دي عزبة سيادتك و فيها انت حر

هو ده مربط الفرس يا عاشق طول ماحنا عمالين نتكلم وبس زيك كده عمرنا ماهنوصل وهانكون دايما ف حالة غياب , نفسى توجه الطاقه اللى عندك دى ف حاجه ايجابيه تفيد الكل مش دايما تعارض وتشتم ف الكل , اكيد احنا كلنا عيوب مش على طول ضحايا , تعالوا نبدأ بنفسنا الاول

قلولي اعمل ايه وبعدين بطل غلاسه

زائر

مش عارفه اقول ايه بس هو وصف مفصل للى احنا فيه بس برضه مش هنقعد نندب حالنا ونتكلم ونشتكى وخلاص لازم نعمل بجد كفايانا كلام بس هنعمل ايه بالظبط هو ده السؤال بس يعنى نحاول ونبدا بنفسنا بمستقبلنا نعمل خطوات عشانه عشان برضه هو كمان ميفضلش كلام فى احلام

زائر

الكلام بجد مش عادددددددى
مايتوصفش ... بس سواء رضينا او مش رضينا
ده حالنا وحال بلادنا...
انتوا بتقولوا المفروض نعمل حاجه او نبدأ بنفسنا ..
حتى لو احنا عايشين تمام وحققنا اللى نفسنا فيه فى حياتنا
ده لو قدرنا اصلا ...
ده مايمنعش حقيقه اننا فى بلد مش مديانا اقل حقوقنا ... فى بلد منهوبه
وده مش هيتغير نهائيا الا بأننا نبقى مش نبقى سلبيينن ومش نخاف ونعارض
حتى لو مش فى النتيجه اللى احنا بنتمناها نبقى عملنا اللى علينا على الاقل
ده من وجهه نظرى ...

موضوع كويس جدا ، وفعال لانه فعلا فيه وصف كامل لبلدنا الحبيبه مصر وشعبها وما به من مأساه . من وجهة نظرى كرد ع السؤال اللى هو نعمل ايه بالظبط ممكن اقول ان ع كل واحد من ابناء مصر او مبدئيا علينا احنا كطلبه جامعه ان كل واحد فينا يلتزم التزام كامل بواجباته حتى نكون عبره لكل صغير وكبير

وربما تكون دى الخطوه الاولى لتحسين الحال

الحل معروف لازم نغير كل حاجه احنا شايفينهاغلط واللي يحصل يحصل طالما قبلت انك تغير لازم تدفع التمن والمشكله ان محدش عايز يدفع التمن ارجوكوا اتكلموووووووووووووووووا

مش ده موضوع
نؤيد سيادتك لفترة جديدة؟
ولا انا بيتهيأ لى؟

» °•.♥.•°بعض الاحـــــــــــــــــــلام ثمنها العمر°•.♥.•°
» كل عام وانت حبيبي
» حبيبي يا رسول الله
» يضيع العمر يا................
» *** لحظات العمر***