موضوع كبير .ايه رايكم

صرح صفوت الشريف الأمين العام للحزب الوطنى الديمقراطى أنه لاصراع داخل الحزب الوطنى الذى يملك جناحان هما جناح الحكومة وجناح الهيئة البرلمانية وان كل من يراهن على خلافات داخلية أو صراع داخل الحزب فهو خاسر.

اما حبيب الكل رئيس الوزراء صاحب القرية الذكية و الطرنش الاسلكي اكد في تصريحة الاخير
ان القطاع المصرفي المصري قادر علي استيعاب الأزمة المالية العالمية
واكد كلامة وزير المالية بان القطاع المصرفي المصري لن يتأثر كثيرا من الازمة المالية العالمية
بل ازيدكم والعهدة علي الاسطي يوسف بطرس غالي ان الاقتصاد المصري يحقق نموا يفوق 7% وهو الأعلى فى منطقة اليورومتوسطى
وصدق علي كل التصريحات جريدتي المفضلة في حالات الامساك الشديدة الاهرام الوطني
يعني اقدر اقولها بالفم المليان للفشلة في كل من البورصات الاوروبية و اليابانية و الاسيوية بل و الخليجية
مصر ام الدنيا بل مصر ام اربعة اربعين بل مصر هي ام جالامبو
ودة اكبر تاكيد علي نجاح مبدأ اللمبي ان الحادثة مأثرتش فية بل هو اللي اثر في الحادثة
وان الازمة العالمية مأثرتش في مصر بل مصر هي اللي اثرت في الازمة وطول عمرنا اصحاب ريالة عفوا ريالة ,احم معلش ريادة

وقد انشرح قلبي عند قرأتي طلب الهيئة العامة للمواد البترولية بزيادة السعر الرسمي لأسطوانة البوتوجاز لــ 4 جنيهات بدلاً من 260 قرشاً

واقدر أدب صباعي في عين التخين واقول عبد الناصر مامتش فان مات عبد الناصر فكلنا عبد الناصر و بالتسعيرة القديمة
واهيب بالهيئة العامة للطرابيش بتخفيض سعر الطربوش الي عشرة مليمات رفقا بالمتطربشين
انا اخر انبوبة جبتها سنة 2001 كانت ب 12 جنية يا مؤمن

المدينة الجامعية تقوم بطرد احد الطلاب بسبب اتجاهة التدويني
كنت زمان اسمع الطرد دة بيكون لامؤاخذة طالب اتقفش بيضرب مخدرات, بيلعب كوتشينة علي السندوتشات بتاعة زمايلة,بيشخبط علي حيطة الحمام ,بيتف علي رئيس المدينة الجامعية لكن علشان بيدون جديدة دي
جايز من الباب ان الحكومة هي اللي مسكناك فلابد من تقبيل الايدي والاقدام والشكر علي نعمة البيات
فكل واحد واخد حاجة من الحكومة قبل ما يدون يسلم عهدتة الي الجهات المعنية
حتي لا نري في المستقبل طلبات باسترجاع غيارات داخلية خاصة بالمدونين ونري المدونين يجرون زلط ملط في الشوارع
وعساكر الامن المركزي خلفهم بالخراطيم وفين يوجعك

نظرية الفرخة الاول ام البيضة قد تم حلها علي يد ابن كبيرنا الشاب المعجزة ربنا يحرسة للست والدتة
ان لولا سياسات الحزب الوطنى لما أمكننا مواجهة الأزمة الاقتصادية
وان لولا الحزب الوطني لما كان هناك ازمة اقتصادية من الاساس
وان كل شيء في طريقة للاصلاح وكما قال بواب العبقري المجنون بلال فضل الاصلاح تاعبنا اوي يا باشا

البيئة تكافح السحابة السوداء وحرق قش الرز برسائل علي المحمول وبعض الفلاحين اعتقد أنها مسابقة
وهي فكرة تساعد الفلاحين علي تشغيل امخاخهم التخينة بدل ما هم مضيعين وقتهم في رحلات الغطس في شرم والشوبنج في كارفور
وبما ان الرسالة وصلت لعدد كبير من غير الزارعين اساسا
فقد اعتقد البعض انك اذا كنت صاحب اكبر سحابة سودة بتدخل سحب علي تلفون من ابو الجيل التالت
ومن لم يجد قش رز قام بحرق ملايات السرير ولبسة العيال

ليبيا تطلب شراء جثث بشرية من مصر.. والمجلس الأعلي للجامعات يرد بان لا مانع
لكليات الطب هناك لتدريب الاطباء
ودة طبعا من باب ان المصري عايش, ميت مفيش زية حاجة كدة علي عينك يا تاجر
واكيد المدونين وصحف المعارضة مش هاتسكت لغاية ما تبوظ البيعة
فا انا انصح الاخوة الليبين بالوقوف علي سواحل المتوسط واصطياد الجثث الساقطة من مراكب الهجرة لايطاليا
اهو اوفر ومفيش حد هاينخور وراكم وطالعة من المية طازة وبتلعب ومتشمش فيها زفارة
واهي فرصة للعيال السيس بتاعة ليبيا تعرف يعني اية دكر مصري

حملة كلنا ليلي حسستني ان النسوان دول كائن فضائي وان الرجالة حيوانات ديناصورية منقرضة
تسعي للقضاء علي الجنس النسائي علشان يخلالها الجو وتلعب مع بعضها عريس وعروسة
انا مش عارف الكائن دة عايز اية تاني
كل المجالات اصبحو علي قدم سواء مع الرجل مأذونة دكتورة , محامية, مهندسة , سواقة نقل ميكروباص تاكس عمال مناجم رواد فضاء رئيسة دولة ,تجار مخدرات,قطاعين طرق وهجامة

عزيزتي ليلي امك اصطلحت غُوري رَوحي

اذا كنت لم تقم بضرب نفسك ومن بجوارك المئة صرمة من الموضوع الماضي يمكنك الاكتفاء بلسع من هو بجوارك فقط علي قفاة
اما من قام فعلا بالمئة صرمة فيستعوض ربنا بقي
Labels

Thursday

عسل ياخواتي عسل ههههههههههههههههههههه

واللّه ربنا يستر علينا اللّه يساعد الأعضاء صب انت وعارفين مصيرك انما احنا غلابة يا ولداه

انت عرفت مصيري طيب ريحني وقول عشان انا عايز اعرف

بجد الواحد مش عارف يضحك وللا يبكى يا عاشق , ربنا يخلصنا من الحراميه واللى مش عندهم ضمير ومنك انت شخصيا علشان نرتاح بقى

زائر

الموضوع كبير فعلا بس كله الا عبد الناصر

والله انا متكلمت عن عبد الناصر ايوه انا مبحبوش لكن لو اتكلمت عليه الوالد يقتلني

» انا رايح اصلي ايه رايكم تروحوا تصلوا العشاء
» مثلي الاعلي .ايه رايكم فيه
» ليا مين غيرك .ايه رايكم في الكلام
» طاعة اليوم (موضوع هيجمعنا)
» هديتي ليكم بمناسبه رمضان .ايه رايكم بجد