سامحنى لو نمت منك
ما هو أصل النوم سلطان..
هو إحنا ليه بنتوه
لما بنسأل حد ع العنوان..
عارف..
اللعب مع الدنيا ممتع ولذيذ..
كان نفسى أبقى دكتور
فاكر إن كل المرضى
ف رقة فاتن حمامة
ولبنة عبدالعزيز.
أيام أبيض واسود
قبل الألوان..
لكن لما نسيت اسمى
والسماعة والبالطو الأبيض
فى بطن العيان..
حولت تجارة انتساب
وفتحت دكان..
وأول ما ابتديت أستعمل النضارة
اكتشفت إنى كان لازم
أدخل فنون جميلة من زمان..
الحمد لله الفرن دلوقتى
بيجيب دخل كويس
وأنا مبسوط إنى بقيت فران..
شوف..
قالها عبدالسلام الكهربائى
بس بعد فوات الأوان..
تتجوز عشان الجواز سترة
تعيش عمرك كله عريان..
يدق قلبك دقتين
تجرى تجيب الدبلتين
وبعدين..
تنسى الدبلة ع الحوض
وف جيب البنطلون اللى ف الغسالة
وتلاقى الدنيا دايرة وشغالة
وإن الراحة
كل الراحة ف النسيان.
