عم شعبان

هو راجل وقف قصاد الزمن لوحده من غير ابن ولا اخ ولا اي حد معاه .لما تشوفه تقدر تلمح في وشه الصمود ده .طويل القامه او ممكن نقدر نقول متوسط الطول بس طبعا اطول مني .عينيه من الحزن ممكن تشوف فيها كل الحاجات اللي مر بيها قبل كده ،دموعه صنعت مكان ليها في خده ،صعوبه العيشه والفقر برضه ظاهرين عليه بوضوح .وعلي الرغم من كل ده الا ان عنده عزه نفس مش ممكن تلاقيها عند حد تاني ،عمره ميقبل مساعده من حد او ياخد حاجه من حد ،عم شعبان عنده حوالي 74سنه يعني راجل كبير في السن وعلي الرغم من ده الا انه لسه بيشتغل وبيتعب وده كله علشان ميمدش ايده او مياخدش من حد حاجه ،حكايتي مع عم شعبان بتبدأمن زمان ،من وانا عندي مثلا سنه ،شاء ربنا انه يخلف حوالي 7او 8 ابناء الا ان مكانش فيه حد بيعيش ليه خالص ،وبما ان احنا جيران فهو كان بييجي يشيلني عل ايديه ،ابويا كان عادي ،لو طلب عمي شعبان انه ياخدني معاه البيت مكانش بيعترض ،لكن سيدي الله يرحمه كان دايما بيرفض وبيعترض وبيزعق ليهم في البيت ،كبرت وكبرت معايه حكايه عم شعبان وكبر حبي ليه وبقيت مأقبلش حد يقول عليه كلمه ،جدي وعمي كانو يحبو ينرفزوني قدامه وأنا اجاركم الله لسانس كان اطول من كوبري 6اكتوبر وهاتك شتيمه فيهم،اتعود علي عمي شعبان بطريقه واضحه لكل الناس يعني كان لازم اروح ليهم يوميا وطبعا لازم يوكلوني بالعافيه ،قبل ما أمشي لازم اكون واخد فلوس في ايدي وطبعا وصيته متقلهمش في البيت ،حكايه انه مكانش عنده اولاد حسسته فعلا ان انا ابنه ،عندنا في الارياف موضوع النقوط في الافراح معروف ،والنقوط ده لازم يتكتب بأسم حد عشان يرجع ليه وطبعا هو معندوش ولاد فكان النقوط ده بيتكتب باسم العبدلله وصوت المييكروفون لازم يخليه يقول اسمي فيه ،كبرت والحكايه بالنسبه ليا اصبحت ارتباط فطري ،لازم اعدي عليه يوميا في البيت وأسلم عليه وهو كمان لو محتاج اي طلب أستحاله يطلبه من حد غيري ،دخلت الجامعه وبدأت ابعد كتير عن البيت وهو أتأثر من غير ما انا ماحس لاني مبرحلوش ،وفي مره رحتله سلمت عليه وقعدت وانا طبعا اللي هعمل الشاي عشان الشاي عنده فرض يعني هتشرب هتشرب ،المهم لقيته متأثر جدا وقاللي :ايه يا عمار هو انت كبرت علينا خلاص ولا مبقيناش نعجبك ,انت عندكم يا عم سيراميك ورخام في البيت لكن احنا علي قدنا صح ،عرفت انه زعلان وقمت حبيت علي راسه ومن ساعته مبيعديش يوم غير لما اروحله ،في يوم من الايام فكر يبيع البيت وكمان الناس من صلابه العلاقه اللي بيني وبينه بدأو يسموني الوريث لكن انا عمري مشفت حاجه زي كده ،المهم البيت اتعرض للبيع وكان ابويا من ضمن اللي عايزين يشتروا ،جالي عم شعبان وقاللي انه بيفكر يبيعه ويشتري بيت صغير ويوفر قرشين يعيش بيهم لأنه مبقاش حمل الشغل وكمان كان بيفكر في الحج جامد جدا ،قاللي انا هبيع البيت وانت ليك عشر الاف جنيه تجيب بيهم حاجه ليك ،وانا برضه اللي هجيبلك الشبكه ،انا لم اتمالك نفسي وانخرطت في العياط بطريقه كبيره وقدام ابويا ورفضت انه يسيب المنطقه ويبعد عنا ،انا حبيت اكتب الموضوع ده علشان تعرفو راجل عظيم زي ده ،راجل اتحرم من نعمه الابناء وفي عز مهو محتاج عمره ممد ايده لحد ،راجل بجد عمره ممد ايده عمره مسرق زي الحراميه اللي بينهبو الناس ليل نهار وعمره مخان بلده .هو نفسه يحج وأنا وعدته بده وربنا يكرمه وينوله اللي هو عايزه في النهايه انا بسأل سؤال هو ممكن الواحد يكون فعلا ليه أبن مخلفوش أو اب مأنجبوش ؟