ايوة طظ والف طظ

ايوة طظ : هو ليه اللى بيقضوا جيشهم ويقع توزيعهم لسواقه قائد في الجيش او الداخليه بيبيعوا نفسهم وكرامتهم ياترى التجنيد وخدمه الوطن في توصيل الاطفال من والى المدرسه ياترى تستريح مرات اللواء من شراء الكرنب والبدنجان من السوق والمجند اللى بيخدم وطنه يتمرمط وعن غسيل السلم ومسح الشقه مش هقلوكوا هو دا الجيش هو دا الداخليه وعلى فكرة المجند بيعمل كدا وبيموت كرامته وهو مبسوط بنظرة رضا من الرتبه او يرميله جنهين يجيب بيهم علبه سجاير دا يبقي عظمه واللى يقول لأ يبقي هو دا اللى خان الوطن .. يبقي طظ والف طظ

ايوة طظ : كل الناس دلوقتى بتتكلم على الواسطه والمحسوبيه والفساد اللى في الوزارات وفي الحكومه بشكل عام ودا فعلا موجود وبشكل واضح .. لكن لو دورنا هنلاقي كلنا بنمارس نفس الحاجات دى .. معايا كدا لما نيحى نعمل شهادة الرقم القومى مثلا .. لازم نشوف ابله ابتسام الموظفه في السجل عشان منقفشي في الطابور ويا سلام لو عم عبد الحميد يعرفنى دا بتاع الطابونه يبقي عيش سوخن وكفائه من غير طوابير .. يبقي طظ والف طظ

ايوة طظ : لما نتعلم 16 سنه ونطلع بين قوسين معظمنا مش عارفين حاجه عشان مفيش تعليم ولا دراسه وبقت عمليه تجاريه ماسكها كبار رجال البلد ولما انا على سبيل المثال اتخرج بجيد من غير محاضرة ولا سيكشن واتحدى اي حد يثبت انى حضرت اكتر من 20 محاضرة في خلال الاربع سنين واطلع بتقدير عام جيد فرق بسيط بين اول الدفعه .. ولما اشترى الشيت والكتاب واسلم الشيت اخد درجات تنجحنى .. يبقي طظ والف طظ

ايوة طظ : لما نتخرج من الكليه اللى المفروض اتعلمنا فيها ومنلاقيش شغل خالص في الحكومه ولما نخرج للقطاع الخاص ونلاقيهم بيمص دم الشباب في الشغل مندوبين مبيعات واللى وصلنا ليه بواسطه ولما نحتاج نتجوز نتكسف على دمنا عشان مفيش شغل ونشيب قبل ما نتجوز يبقي طظ والف طظ

ايوة طظ : لما الحزب الوطنى يعمل شعارة علشانك انتا ولما يبقي لفظ انتا دا عايد علينا الشعب يعنى ومش لاقين لا شغل ولا سكن ولا اكل ولا عارفين نفتح بيت .. او الشعار دا يبقي عايد على الريس القادم جيمى لمساندته .. ولما تبقي نسبه الفقر والفساد بتزيد .. والشعار اللى بيغيروة من سنه لسنه .. ولما يقولوا صرفوا على المؤتمر اللى فات 30 مليون جنيه في 3 ايام من مال الشعب.. ولما الشعب ابنه الجزمه دهوة مش لاقي ياكل . و30 مليون دول لو فتحوا مصنع كانوا شغلوا الف واحد وفتحوا ال بيت .. يبقي طظ والف طظ

ايوة طظ : لما المؤقتين اللى بيتعينوا في قطاعات ووزارات الدوله ب 80 جنيه يحلموا بالتثبيت وخاصه التعليم العالى الجامعات يعنى .. ولما يفضلوا اكتر من 10 سنين في المؤقت دا ميجيش مواصلات .. ولما ناس تانيه في قطاعات تانيه بس عشان معاهم واسطه ياخدوا الوف يبقي طظ والف طظ

ايوة طظ : لما يفكروا في السفر بره عشان مصر قست اوى على ولادها .. ولما يهربوا لايطاليا عن طرق ليبيا ويموت منه الوف عشان يطلعوا يشتغلوا في الحمامات في ايطاليا .. ويرجعوا لينا معاهم شويه فلوس بين قوسين للى مايكلوش السمك في البحر يرجعوا يشيطوا الشباب وكله يبقي عايز يسافر عشان يرجع بجاجيت جيلد اسود ويشتري حته ارض ولو عربيه على الاقد .. يبقي طظ والف طظ

ايوة طظ : لما كل فترة قطرين يدخلوا في بعض .. ويموت من اخواتنا المره دى ميات واللى قبلها الوف .. ولما يتشال فيها الوزير او يستقال ... يافرحتى الوزير الجاى هيحصل برده قطرين وهيتشال واقول برضه يا فرحتى .. طب اثر في ايه ان الوزير عشان يتشال ولا لما اتشال ايه اللى استفدناه اخواتنا ماتوا واللى كان كان واللى هيجى بعده ويحصل حادثه ويتشال..المنظومه بايظه وشعبنا بجد سلبي .

ايوة طظ : لما يكون شباب الجامعه صبيان وبنات مسقطين البنطلونات دول البنين والجيل وغيرة ولما يكون في ايد معظم الشباب الموابيل وفي بعض الاوقات اتنين + علبه السجاير + المناديل + مفاتيح عربيه حتى لو مش عنده عربيه .. ولما البنات يبقي لبسهم قرب يبقي عريان صيف وشتى ولما كليه اقتصاد وعلوم سياسيه اشوف فيها الكلام دا بعينى يبقي طظ والف طظ

ايوة طظ : لما نروح المستشفي بالحاجه الكبيرة عشان رجليها اتكسرت ونفضل يومين ميجيش دكتور ولا تمرجى ولا حتى زبال يشوفها .. ولما يكون مكتوب انها بتاخد دوا على الورق لما اشتكينا .. ولما نروح الجناح الاقتصادى اللى هو بفلوس مكيف بقي ياريس وتيجى دكتورة مرتين وممرضه تتابع كل لحظه .. عشان بفلوس واللى ممعهوش يموت في بيته اكرمله احسن من المبوله اللى كنا فيها يبقي طظ والف طظ

** بس كل دا عمرى ما هسيبك يا مصر كل دا وانتى احسن بلد وهفضل فيكى لحد ما ترجعى ام الدنيا او اموت وانا فيكى وهفضل اعملك اى حاجه ترفع منك حتى لو صغير .. وعشان خاطرى كل اللى هيقرأ يسامحنى لو قلت لفظ مش كويس او فكرة مقدرتش اعبر عنها .
** كمان حاجه امى مش احسن ام في الدنيا ولا اكرم ولا اجمل ولا ولا ولا بس برضه في نظرى هيا اللى تقريبا مكتمله وهيا اللى بحبها اكتر من كل امهات العالم .. برضه انتى يا مصر لا انتى احسن بلد في الدنيا بس في نظرى انتى ام الدنيا انتى اللى فيكى كل الخير .. يا مصر هترجعى تانى مصر واحنا فيكى وليكى

ميت ألف
فرصه عشان أسيب مصر
ولا عمري
سبتها

علشان هى
بلادي اللي بجد بحبها
بحبها

بكدبها وصدقها
بحب فيها
أصالة وندالة أهلها

بحب فيها
السهر

بحب
زيفها وأصلها

بحب فيها
طلعه الشمس
تنور
وشها

بحب فيها
القمر طالع
يغازل
حسنها

بحب فيها
المشي علي شط
نيلها
وبحرها

بحب فيها
بناتها

راسمين
ملامح شعبها

دي بنت مايصة
وحاطة
وردة
فـ
شعرها

ودي بنت جد
ونازلة
جري
لشغلها

هتلاقي فين
بلد
فيها
الكنايس والجوامع
بتحضن
بعضها

مسلم مسيحي
إخوات
راضعين طيبة
من صدرها

نبع الحنان
ويناموا حاضنين
أرضها

هتلاقي فين
تاني بلد
كل حاجه
فيها
تخليك
تحبها
هتقولي
ظالمه هقولك
برضو
بحبها

هتقولي
ضالمه
مهو ده سواد
شعرها

هتقولي زحمه
هقولك
علشان بنعشق
أرضها
هتقولي فيها
فساد
هقولك ده من
طيبه شعبها

جرب كده تسهر
ولو وحدك
علي ضف نيلها
وحبها

جرب تشوف بنت
حلوه

مع شاب واقف
جمبها

بيحبها شايل
في قلبه
هموم الدنيا
كلها

وبرضو
بيحبها

جرب كده تاكل
دره وترمس
علي
شطها

وتشوف وشوش
الناس

وإضحك
زيها

طب وإنت ماشي
لوحدك

ووقعت في
مشكلة
مش بتلاقي
ألف واحد
جمبك
بيحلها

لا تعرفهم
ولا يعرفوك
بس جمعكم
حبها

اهي هي دي
مصر

زاحمة
ظالمة
فاسده ضالمة
مش مهم

ده كفايه خفت
دمها

هأفضل لمصر
أقول وأعيد

أنا أصلي
عاشق أرضها

هتلاقي فين
تاني بلد
كل حاجه
فيها
تخليك
تحبها
هتقولي
ظالمه هقولك
برضو
بحبها

ايه الجمال ده يا خالد , بجد من اجمل المواضيع اللى الواحد قرأها فى المنتدى(مش الكأبه بتاع عامر) شكرا جزيلا ليك والى مزيد من التقدم

والله يابني موضوع رائع جدا خلتني احب البلد واللي فيها وجزاك الله كل خير يا حبيبي

الله عليك يا خلوووووووووووووووووووود.بصراحة من أجمل المواضيع اللى قريتها فى المنتدى.وعلى رأيك بالرغم من اللى بيحصل فيها دمها خفيف وأجمل من غيرها كتير.فكر كدة اقعد مع واحد مسافر هتلاقية هيموت ويرجع مصر وهيقولك انت فى مصر عايش فى نعمة رغم المشاكل اللى فيها.وعلى رأى شيرين ما شربتش من نيلها.شكرا ياخلووووووووووود على الموضوع الروعة ده وأتمنى المزيد.

ايه يا جماعة الردود الجامدة دى ، انا مش متعود على الحاجات دى وبعدين لو الموضوع جميل فبقى اجمل بعد ما رديتو انتو عليه يا اغلى اصحاب فى الدنيا شكرا ليكو .

» ايوة كدة يا زيانى اخيرا
» هديه العروسيين والف الف مبروك
» يلا كلنا ندخل نقول حمدلله على السلامه لحبيبة قلبى والف مبرووووووووك