إيش عرّفك إنت؟

"تحت شعار… أحبّك انت يا أبيض انت… نعلنها صريحة مريحة… إيش عرّفك انت؟!!" هكذا بدا محمد جابر حملته من مدونته جابريزم وسرعان ما انتقلت وانتشرت بين شباب المدونين ورواد الانترنت وانطلقت في جروب على الموقع الاجتماعي الشهير الفيس بوك تحت عنوان إيش عرّفك إنت؟
وسرعان ما انتشرت الدعوة ووصل عدد أعضاء المجموعة على الفيس بوك إلى ما يزيد عن 2500 عضو بعد عدة أيام من إطلاقها .
" إيش عرفك انت " مقدمة لأسئلة يطلقها الشباب في وجه جمال مبارك يؤكدون بها معارضتهم لفكرة ترشحه لرئاسة مصر او وراثتها عن والده ويؤكدون عبر هذه الأسئلة عدم معرفته بشئ حتى يصبح رئيسا للدولة وهي كما يقولون ليست أسئلة لكنها إجابات .
ومن الأسئلة التي يوجهها جابر لجمال مبارك "إيش عرّفك انت يعني حد من أهل بيتك يتعب و تبقى داير بيه على مستشفيات البلد مش لاقي دكتور عدل ولا معاك فلوس تروح عيادة ولا حتى تجيب علاج؟

إيش عرّفك انت يعني ايه تتخرّج من جامعه بيقولوا عليها قمّة و تشتغل صبي ميكانيكي بـ 100 جنيه في الإسبوع عشان تعيش؟
إيش عرّفك انت يعني ايه يجي عليك نهار و مفيش في جيبك غير 5 جنيه هتعيش بيها اسبوع و مش عارف هتتصرّف ازاي؟

إيش عرّفك انت يعني ايه جوع؟

إيش عرّفك انت يعني ايه فقر؟ "
وتفاعل الشباب الساخط مع الحملة بسرعة شدجيدة وأطلق كثير منهم أسئلته لتصيب صورة جمال مبارك في مقتل وتبين عجزه وعدم درايته بأحوال البلاد ومواطنيها فيقول أحدهم مذكرا إياه بالراتب الهزيل للعمال والموظفين " ايش عرفك انت اللي بيقبض 300 جنيه في الشهر وعنده عيلين بيعيش ازاي؟ جربت تعيش بتلتميت جنيه في الشهر بطولك؟ "
وكذلك موظفي الحكومة " ايش عرفك انت بحال المواطن والموظف في المصالح الحكومية: السجل المدني، المرور، الجوازات..إلخ؟ وايش عرفك بالمرتب اللي بيقبضه الموظف وبالرشوة اللي بيدفعها المواطن؟ "

كما ذكره آخر بسائق الميكروباص المغلوب عل أمره " ايش عرفك انت شكل سواق الميكروباص، بعد ستاشر ساعة لف في عربية شكمانها منفس وتعامل مع ركاب ياكلوا دماغه عشان خمستاشر قرش وامين شرطة بيطلب منه اتاوة، وهو راجع بالليل البيت بيعمل ايه في مراته؟
ايش عرفك انت بقى بمراته بتعمل ايه في عياله عشان تفش غلها؟ "
وحتى بالفلاح البسيط ذكره به أحدهم قائلا " ايش عرفك انت بفلاح صرف اللي وراه واللي قدامه على زراعة القطن عشان يجهز بنته وجيتوا انتوا بمنتهى البساطة عملتوا فيه مغرز وادتوا له تقاوي بايظة: مدودة، طلعت المحصول اصفر، ما طلعتش محصول اصلا؟ "

كثيرة هي الأسئلة التي وجهها الشباب لجمال مبارك ولم تترك أمرا إلا ذكرته به فمما قالوا " ايش عرفك انت باحساس شاب لسه في العشرينيات وقلبه حزين وعنده احباط ويأس الدنياكله راكبه وتشوفه تديله 100 سنه.

اتقتل طموحه وكل الابواب مقفوله في وشه هو ومفتوحه علي مصراعيها للتافهين والاغبياء والفاشلين

ومطلوب منه يكون انسان كوووووووول وميحقدش علي ولاد الناس الواصلين علي الرغم من تفوقه وكم الشهادات العليا وكورسات اللغه والكمبيوتر اللي واخدها لكن مش عارف يلاقي مكان محترم يقبله للعمل فيه وكل ده لسبب بسيط لأنه معندوش واسطه واسطته دراسته وعمله الجاد ودول موصلهوش لاي حاجه...

ايش عرفك انت بواحدة ست عجوزة ماتت في سريرها وحيدة بتبكي ان ولادها كلهم مش جنبها عشان راحوا الخليج بعد ما ضاقت بيهم الدنيا هنا عشان يعرفوا يستروا نفسهم

ايش عرفك انت باوضة وصالة ساكن فيها 3 اسر بملحقاتهم

ايش عرفك انت بناس ساكنة في عشش كل 10 اسر ليهم حمام واحد مشترك

ايش عرفك انت بواحد ولا واحدة عزيز النفس مش لاقي يأكل عياله ويسترهم وبيستعفف ومش هاين عليه نفسه يشحت

ايش عرفك انت بناس بتموت عشان مش لاقيين تمن الدوا

ايش عرفك انت بينا انت مش مننا على فكرة

ايش عرفك انت بحالنا وحال عيال وعمال المصانع في بلدنا

ايش عرفك ومين فينا اصلا عاوز يعرفك

من الاخر خليك بعيد لانك متشرفناش رغم اننا نشرفك

ايه عرفك بواحد عنده الكبد و استسقاء وبيعملوله بزل كل شويه و بيلف على التامين الصحى علشان يلاقى الدواء و لسه بيشتغل لاخر نفس علشان يوفر لولاده لقمه؟

ايه عرفك بمعنى انك تكون مصرى ابن مصرى شريف وتتعامل معمله الكلاب فى القسو ولو حد طلع بسبور امريكانى ؟؟

ينضربله تعظيم

ايه عرفك عن شاب باع الى وراه والى قدامه علشان يركب قارب فى البحر علشان ياكل اكله نضيفه؟

ايه عرفك باكل مسمم بالمجارى و انت بتاكل الاورجنك؟

ايه عرفك بواحده غلبانه بتحط القرش على القرش علشان تجيب خلاط لجهاز بنتها احسن الجوازه حتبوظ؟ "

وتتوالى أسئلة الشباب لجمال فيقول آخرون " ايش عرفك انت بواحد ساكن فى عشة

يصحى من نومه ويكون فطاره صخرة تقع عليه تدفنوا تحتهاو مقدرتش تطلعه, عمرك صحيت من النوم؟

ايش عرفك انت باحساس ام مستنية ابنها يرجع من غربته هو وابنه من السعودية و الحوت ياكلهم فى البحرو الحوت ياخد 7 سنين,عمرك حسيت بالظلم ؟

ايش عرفك بام تانية ابنها نازل يعيد عليها ويولع فى قطار. عمرك ركبت قطار؟ "

وكان ضحايا الثانوية العامة وكلاب الانتساب حاضرون فقال أحد الشباب " ايش عرفك بـ شباب كتير بيدرسوا حاجة مش طايقنها لمجرد ان مكتب التنسيق رماهم فيها ؟؟
ومع ذلك بيذاكر وبينجح بيتخرج
ايش عرفك بطلبة الانتساب المشوخين من الدكاترة وادارة الجامعة اللي عاملاهم سبوبة بصرفوا بيها علي الجامعة وكل شهر زيادة في الرسوم واخرها مفيش حضور علشان انفلونزا الخنازير"

وختم جابر وصفه للجروب قائلا " إيش عرّفك و إيش عرّفك.. انت ابن القصر و مخرجتش منه لاعمرك شوفت ولا دوقت فقر ولا مرض

جمال مبارك عفواً انت متنفعش… متصلحش… متحكمش… بأي شكل و تحت أي مسمى!!! "

أسئلة كثيرة طرحها الشباب من خلال مدوناتهم او من خلال مجموعة الفيس بوك وتبحث كلها عن إجابة أو بالأحرى فهي تؤكد على عدم أحقية وجدارة جمال مبارك بمنصب الرئاسة الذي أوشك قريبا منه بعد قرب انتهاء مسلسل التوريث والذي من المتوقع حدوثه عام 2011

فياترى هتقولوا لجمال مبارك بعد البداية بجملة

إيش عرّفك انت .... ؟؟

الاول حمد الله علي السلامة يا عامر بية ومن حقك يا عم(لية؟ خليها في سرك متخفش مش هقول لحد علشان الحسد) وبركه انك رجعت بالسلامة ومش عايزينك حرمنا بقي من مواضيعك مااااشي ياخوية

الله يسلمك يابو حميد وبعدن انت هتحسدني علي ايه بس .خليني ساكت احسن .بس انت مقلتليش انت هتقول لجمال مبارك ايه .ايش عرفك انت .............؟ايه بقي اللي هو مش عارفه

الواحد يا عامر والله مش عارف يقوللة اية ولااية ولا اية ولا اية

بس طبعا ايش عرفك انت (ياجمال بية)

إيش عرفك إنت بدموع النساء الذين فارقهم أزواجهم فى سجون القهر والظلم للسيد الوالد
إيش عرفك إنت بواحد قاعد في بيته معلق على الحيطة شهادة بكالوريوس بتقدير جيد جدا تم تخطيه في التعيين بالدراسات العليا(كوسة)
إيش عرفك إنت بالخناقات التي تتم يومياً بين سائق الأجرة والراكب بسبب العملة المعدنية
إيش عرفك إنت بطوابير الخبز التى راح ضحيتها الكثيرون من أجل رغيف خبز مخبوز بأعقاب السجائ والمسامير
إيش عرفك إنت بمسلمين يموتون فى غزة بسبب غلق المعابر فى وجوههم
إيش عرفك إنت بقلوب تحترق حزناً على حال المسجد الأقصى
إيش عرفك إنت الصراع اليومي من أجل أنبوبة الغاز التى تصل أحياناً إلى ١٠ جنيه مع علمهم بأن غاز بلادهم مدعم لإسرائيل
إيش عرفك إنت بيأس من إدراك أي وظيفة مستقرة وقد أصبح كل قطاع بالبلد حكراً على فئة معينة وأبنائهم
إيش عرفك إنت بالمجاري الطافحة فى كل مكان وأكوام الزبالة التى خنقت الشوارع والحواري
إيش عرفك إنت فارقونا يرحمك

وإنت ايش عرفك انت؟؟؟؟؟؟؟؟؟؟؟