" حكايتنا "

على الرغم من اننا ف وسط الامتحانات ودوشتها
بس بردو الواحد مش قادر ينساكم ويركز شوية ف المذاكرة
انتو عارفين اني انا مابكتبش شعر كتير
بس والله من غير اي تحضير
لما احمد شعبان عطاني كشكول عشان اكتب فيه ذكرى
لقيت نفسي بكتب القصيدة دي
يارب تعجبكم

" حكايتنا "
دي حكاية حبنا الهادي الحزين
حكاية حب عاشت بس اربع سنين

كان ف يوم جينا اتصاحبنا واتقابلنا
كان نهارنا عادي جدا زي ليلنا
أصلنا اصحاب .... لسة يدوب متعرفين

دامت ما بينا عشرة حلوة ... مش غريبة
اصل كل يوم كنا نشوف نفس الكتيبة
واللي منها وشوش جميلة
كان فيها بردو وشوش كئيبة
قصره يعني .... كنا يدوب متعرفين

وابتدا الحنين يزيد حبة حبة
قصدي يعني العشرة اتقلبت محبة
يعني خلاص.......
مبقيناش اصحاب لسة يدوب متعرفين
دحنا كنا حب عمر ... عشرة سنين

كنا نجري.. نلعب .. نبكي.. نتعب المهم نكون مع بعضنا
ولما كنا نفترق .. نحلم ببعض ف حلمنا

زاد الحنين والحب زاد
كنا نعدي لبعضنا أبعد بلاد
المهم نكون مع بعضنا

وفضلت الايا جمييييييلة ...
ضحك .. لعب .. أجمل هزار
لحد لحظة الاحتضار
أيوة لحظة الاحتضار
أصل روحي خارجة اهي من بين ضلوعي
صعب جدا ....
انك تكون عاجزعن الاختيار
غصب عن قلوبنا لازم ناخد القرار
اللي هو أصلا مش قرارنا
هو يعني حد عاقل يرضى بردو يعيش وهو ميت
ده حتى يبقى اسمه انتحار

المهم لازم نسلم اننا خلاص هانفترق
وان اللي باقي بين قلوبنا زكرى .. بكرة تتحرق

وافتكرت أيامنا الجميلة

افتكرت لما كنت ببكي
دمعة عيني تنزل من عينيك

وافتكرت لما كنت بافرح
فرح الدنيا كان بيبان عليك

وافتكرت لما كنا مجهزين لحفلة كانت حلمنا
وبسذاجة فرحنا بيها جدا ... كانت أكبر فرحنا
والحقيقة ان الحكاية كلها كانت خداع
كانت ف نظري أعلى صرخة ف وشنا بتقول وداع

طب وداع

وداع ياحب العمر ...أرجوكم سيبوني
وداع سيبوني اغرق ف بحر دموع عيوني
وافتكر مع كل دمعة .. كل ضحكة من قلوبكم
كل بسمة من عيونكم ... كل همسة حب منكم
وافضل ابكي بدمع قلبي لما لحظة افتكر ....
ان اليوم هاييجي وهاتفوتوني

وداع ؟؟؟ وداع ايه بس ؟؟؟؟ هو ينفع ؟؟؟؟

هو ينفع ان قلبي يعيش من غير دم ف وريده
هو ينفع انسى واحد لما اشوفه ايدي تبقى سابقه ايده
ابقى عايز احضنه ... اسلم عليه ... يزيدني من الحنان وازيده

هو ينفع انسى حب عاش ف قلبي واتربى ف ضلوعي
ولما كان اوقات بيدبل كات ترويه دموعي

اصل مش فاضل لقلبي غير دموعه
تبكي حب العمر كله ... تطلب رجوعه

الله يسامحكم

كنتو بتقولو ان حب الدنيا كله .. بايدينا هانجيبو
ومننو نرسم احلى وردة حب يقدر قلب يهديها لحبيبو
طب خليتونا نحب فيكم لييييه..... لما انتو هاتغيبو
طب خليتونا نشم ليه ف الورد
لما الشوك ف قلب الورد طارح
منت اللي تستاهل .... منت عارف ان الشوك ف قلب الورد
يعني روح قلبو وحبيبو
فلما يجرح ابقى سيبو ... ولما يدبح بردو سيبو
سيبو ياخد من عمر قلبك حقو ونصيبو
هو انت عمرك شفت ديب كان للحمل طبو وطبيبو

الله يسامحكم
طب لمين هابكي... لمين هاشكي ... فمين هاشخط وهاتخانق
لمين هاطلع على المسرح واكدب واقول بعلو الصوت ... مش هانفارق
وادينا اهو بنتفارق
بنتخانق ... مي اللي يكتب احلى ذكرى ف كشكول ذكريات
اللي كل حرف فيه بيقول خلاص...... الماضي مات
دي حيالله ذكرى .... يعني بكرة.... تقرا فيها
وتمصمص شفايفك ... واحتمال حبة اهات
بس في الاخر ف أقرب درج جمبك ... تاخد مكانها من سكات

بس عايز اقوللكم كلمة اخيرة

برغم الحب اللي مكتوبلو النهايه
برغم الجرح اللي ف قلب القلب
واللي عجز الطب عن راحتي ودوايا
والحكاية ....... والرواية ......
وحب العمر اللي متكوم ورايا
وصورتك دي اللي محفورة ف قلبي
وهاتفضل معايا

برغم كل ده

بردو حبنا هايفضل لنا
شمعة النور اللي هاتنورلنا
كل سكة مضلمة بقيت عمرنا
هي يعني عشرة يوم ... أو يومين ؟؟

دي كات حكاية حبنا الهادي الحزين
حكاية حب .. هاتعيش على مر السنين

........................


اسف اني طولت .... بس والله انتو حبكم ف قلبي اكبر من كل الكلام .... ولو نسيتوني .... انا عمري ماهنساكم ...................
................................................................محمد حسام