الراجل مش بس بكلمته !!

تقريرعجبني قرأته ف إحدى المنتديات
إليكم التقرير............ فتابعونا
***********************************

النهاردة هنخرج برة المنتدى
في جولة صحفية عن موضوع مهم أوي
هتعرفوه بعد ما تشوفوا التقرير معايا قصدي تقرأوه
********************************************

أخدت مواصلة من على باب المنتدى
وروحت على الجامعة

شفت شاب واقف تحت شجرة
وبيدخن فقلت أكبس عليه وأعمل مع الحوار ده
أتعرف على حضرتك
أنا اسمي هيثم
اهلا بيك ياهيثم
هيثم عاوز أسألك سؤال
اتفضل
أنت بتدخن ليه
بص لي ونفخ في وشي الدخان
كحكحكح ايه يابني هتخنقني ولا ايه
بقولك بتدخن ليه مش اخنقني
طب وده سؤال برضه ياعم الحاج
كل الرجالة بيدخنوا
يعني لما بتدخن ياهيثم بتحس انك راجل
طبعا بحس أوي , بحس خالص
طيب ياهيثم سلام
سلالام ياعم الحاج ونفخ تاني في وشي الدخان

مشيت شوية
لقيت شاب واقف مع بنت
قلت لازم أعمل معاه الحوار
بس بس
بص لي وأخد باله وجالي
أيوة
ممكن أتعرف عليك
أنا طارق
ممكن تقولي ياطارق أنت واقف مع البنت دي ليه
أنت هتستظرف ولا إيه ؟؟
لا والله أبداً عاوز أعرف بس
كل الرجالة اللي في سني لازم يكون لهم بنت يمشوا معاها
الرجالة !!!
آه طبعاً رجالة عندك إعتراض ؟؟؟؟؟؟
لا أبداً يا أستاذ طارق
طب عن إذنك علشان مينفعش أسيبها لوحدها علشان محدش يعاكسها
أنت بس اللي تعاكسها
بتقول إيييه ؟؟؟
لا أبداًَ مفيش حاجة

زي ما أنتم شايفين التقرير ده متعب أد إيه
واحد خنقني والتاني كان هيضربني وربنا يستر في الباقي
ياريت الإدارة تصرف لي بدل طبيعة عمل

ماشي فلقيت هيصة وزعيق جامد أوي
بصيت لقيت واحد ضخم
ماسك راجل غلبان ونازل فيه طحن
إيه ياعم أنت ؟؟
أنت مفيش في قلبك رحمة
بص لي حتة بصة
بصراحة خفت منه
قال لي في حاجة ياكابتن
استجمعت قوتي وقلت له
أنت بتضربه ليه بالطريقة دي
أنا راجل المنطقة وأعمل في منطقتي زي ما أنا عاوز
يامعلم بالهداوة بس
أنت ما سمعتش الحديث بتاع النبي عليه الصلاة والسلام
اللي بيقول فيه
ليس الشديد ذو الصرعة إنما الشديد الذي يملك نفسه عند الغضب

ساب الراجل الغلبان من ايديه وقاله خلاص عفوت عنك المرة دي
لكن المرة الجاية مفيش حد هينجيك من تحت ايدي

قلت له ربنا يصلح حالك يامعلم وبالراحة عالناس شوية
وبالإذن ياعم الفتوة

الجو حاااااااااار جداً قلت أروح أجيب عصير من المحل اللي على أول الشارع

السلام عليكم
وعليكم السلام
لو سمحت ياحاج عاوز عصير مانجا
اتفضل
أذاااااااااااااااااااااان الظهر
لقيت الراجل واقف عادي خالص ولا كأن في حاجة
بقولك ايه ياحج
نعمين
أنت مش هتروح تصلي ولا إيه
هصلي بعدين
إزاي بس
يعني عاوزني أسيب شغلي وأروح أصلي
وفيها إيه بس
العمل عبادة والراجل هو اللي يأخد باله من شغله
طيب ما تكمل المرجلة وتروح تصلي
يلا ياكابتن شوف مصلحتك علشان مش عاوز أذيك
طيب ياعم بالراحة شوية متزقش

تقرير إيه ده اللي كل ضيوفه عاوزين يضربوني

صليت الظهر وقولت أروح منطقة تانية
الأتوبيس جاااااااااااااي
معلش هحط عدة الشغل في الشنطة مش فاضي لكم

وبعد جهد جهيد طلعت الأتوبيس
ولقيت كرسي بالعافية

في المحطة التانية
طلع راجل عجوز
فقلت تعالى ياحاج اقعد مكاني
قام اللي قاعد قدامي وقال
والله ما هو قاعد الا مكاني أنا
وقام وقعده مكانه وفضل واقف جنبي
قلت له عملت ليه كدة
قال أنا مش راجل ولا إيه
وبعدين الرسول عليه الصلاة والسلام
قال وأن تعين الرجل في دابته فتحمله عليها صدقة
قلت صلى الله عليه وسلم يلا ياعم فزت بالأجر

كان قاعد شاب جنبي باصص للشباك علطول
حسيت أن دماغه مش في الأتوبيس أصلاً
لقيته بيهمم بكلمات مش فاهمها
ركزت أوي علشان أسمع هو بيقول إيه
لقيته بيذكر ربنا وعينه فيها دموع
فافتكرت حديث السبعة
ورجل ذكر الله خالياً ففاضت عيناه
فدعيت له في نفسي وقلت ربنا يكتر من أمثالك
وبعدين وصلت للمكان اللي كنت عاوزه ونزلت من الأتوبيس

بيني وبينكم عصير المانجا اللي فات شربته من غير نفس لأن صاحب المحل زي ما أنتم عارفين
لقيت محل تاني قلت فرصة
وأنا رايح
أذااااااااااااااااان العصر
وصلت المحل لقيت صاحبه بيقفل
قلت واحد عصير مانجا لو سمحت
قالي بعد الصلاة
قلت علطول مش هياخد وقت الأذاان لسة مأذن
قالي بعد الصلاة
كل ما أقوله حاجة زي ما يكون متبرمج على كلمة بعد الصلاة
وفي الآخر قالي يابني أنت عاوزني أخالف الآية
قلت له آية إيه
(أَيُّهَا الَّذِينَ آَمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَنْ ذِكْرِ اللَّهِ وَمَنْ يَفْعَلْ ذَلِكَ فَأُولَئِكَ هُمُ الْخَاسِرُونَ )
والرجل هو اللي مينشغلش بالشغل عن الصلاة
قلت له عندك حق
جزاك الله خيراً
وروحت صليت معاه العصر
وبعد الصلاة اشتريت العصير
طبعاً المفروض يكون ليا في المهمة دي بدل عصير
يلا مش مشكلة

وبعدين اتمشيت شوية على النيل لغاية المغرب
قلت أذكار المساء وروحت صليت في المسجد
مشيت شوية لقيت راجل شايل حاجات تقيلة وزي ما يكون خايف لحد يشوفه
مشيت وراه قولت أكيد وراه حاجة
لقيته طلع شقة في بيت قديم أوي
شوية ونزل فاضي قلت لازم أعرف الحاجات اللي معاه راحت فين ؟؟
مستغربوش أصل الصحفي الكويس اللي زي لازم يتمتع بنظرة زي نظرة المفتش كرومبو
طلعت الشقة وخبطت طلعت ست عجوزة
قلت السلام عليكم ياحاجة
قالت وعليكم السلام يابني خير؟؟
حسيت أنهم فقرا وممكن يكونوا محتاجين حاجة
قلت أنتم محتاجين حاجة ياأمي ؟؟
قلت ربنا يكرمك يابني بس الحاج أبو عبدالله مش مخلينا محتاجين حاجة
قلت الحاج أبو عبدالله اللي كان هنا من شوية
قالت الله يبارك له ويعمر بيته ويبارك له في ولاده
5 سنين وهو واخد باله مني ومن ولاد ابني الأيتام
قلت لها الله يبارك له ياحاجة ويكثر من أمثاله
سلام عليكم
قلت في نفسي مش جاي تسئ الظن ياكرمبو إلا في كافل الأيتام
وتذكرت حديث النبي صلى الله عليه وسلم
أنا وكافل اليتيم كهاتين في الجنة وأشار
باصبعيه السبابة والوسطى

طبعاً بعد الرحلة الشاقة دي نكون وصلنا لنهاية التقرير

استفدنا إيه بعد التقرير ده ؟؟؟

تقريرنا كان عن مفهوم الرجولة عند الناس والشباب خصوصا

شفتوا هيثم مفكر الرجولة في سيجارة

وطارق معتقد أن المشي في البنات هي الرجولة

والراجل الفتوة مفكر الفتونة هي الرجولة

وأما صاحب المحل اللي كان عاوز يضربني مفكر أن الشغل وإهمال الصلاة هي الرجولة

على العكس منهم

الأخ اللي قعد الرجل العجوز مكانه شايف أن هي دي الرجولة

والأخ اللي كان قاعد جنبي شايف أن ذكر الله وخشيته هي الرجولة

وصاحب المحل اللي مرضاش يبيع بعد الأذان أي حاجة وشايف أن ده هيعطله عن الصلاة لأن الرجولة من وجهة نظره أن الشغل ميعطلكش عن الصلاة

وكان ختام التقرير الحاج أبو عبد الله اللي بيكفل الأيتام من 5 سنين وبيخفي عمله ده وماشاء الله مش مخليهم محتاجين حاجة

أرجو أنكم تكونوا استفدتم من التقرير

كان معكم المراسل
أبو عبد الملك المصري

**************************************

اول ما قرأت عنوان الموضوع
جاه علي بالي صوت احمد ماهر وهو بيقول" الراجل مش بس بكلمته الراجل بموبيلاته وشلته"ههههههههه
موضوع جذاب وشيق جدا كما هو الحال في مواضيع نسايم اللي بجد باستمتع جدا وانا بقرأها
ربنا ما يحرمناش منك يا نسايم ولا من موضيعك الجميلة
واجمل حاجه في التقرير انه بيبن ان زي ما في هيثم وطارق في لسه رجاله بجد
ربنا يكتر من امثالهم ويهدي الناس التانيه .....
وبجد اللي كتب التقرير ده يستاهل شوب مانجو كبييييييييييييير
وانتي طبعا يا نسايم اكبر شوب يانسون وسلامااااااااااااااااااااات نج..... كتيييييييييييير

موضوع جميل اوى نسايم
وبيبين فعلا اد ايه فى ناس فاهمين الرجولة غلط
واد ايه برده لسة فى ناس فيهم الخير
جزاك الله خيرا نسايم

رااااائع وفعلا احنا فاهمين الرجولة غلط ولازم نغير المفهوم ده علشان نفوز بالجر والثواب

شكرا جزيلا وربنا يجعله ف ميزان حسناتك يارب

شكرا ليكي يا برنسيس ع شوب اليانسون جاى ف وقته عشان زوري وجعني جدا
وشكرا للسلام الفظيع بتاعك
ودايما بشكرك على تعليقك اللي بستناه دااائما ، كده 3 شكريات خلى بالك

***************

جزيتم خيرا لمروركم وتعليقكم صن وعمرو

ربنا يبارك فيكم جميعا

تصدقى فعلا يا نسايم ان معظم الناس فاهمة الرجولة غلط بس انا بردو عندى مفهوم تانى للرجولة ........ وعلى فكرة انا بحب الجملة دى يا برنسيس وانتى شوهتيها "الراجل مش بس بكلمته الراجل برعايته لبيته واسرته" عشان كده سلام شح.......كتييييييييييييييييييييير