استيقظنا قبل الفجر ( انت هاتبدأها كدب هو احنا كنا نمنا اصلا)
صلينا الفجر وعقدنا النية على الخروج ليوم شاق ومنتظر ايضا منذ زمن بعيد وبعيد جدا
اتجهنا جميعا من بلاد مختلفة بوجهات مختلفة الى وجهة واحده الا وهى منطقة تجنيد الجيزة لأداء الكشف الطبى المؤهل للجيش ان شاء الله
وصلت اولا لأجد الاف من الشباب يجلسون على جانب الطريق كلهم محلقين الرؤس حالقين الذقون مكفهرين الوجوه ناعسين العيون يحملون جميعهم "ملفات" بها اوراق التجنيد التى قضوا الشهر واكثر من الشهر يناضلون مع الروتين الحكومى حتى انهوا اجراءات الاوراق اللازمه للكشف الطبى.
ظللت اقلب فى الوجوه لأجد شخصا اعرفه فلم اجد فى البداية سوى زميل لى من قسم تاريخ فحييته وانتظرنا سويا .
وفجأه لاح فى الافق شخصا اظن بأنى اعرفه وعندما اقترب إذا به احمد عبد الغفار فحييته بفرح لأنه كان اول من وفد من قسم اللغة الانجليزيه , وبعد ذلك جاء الفارس المغوار , لقد بصرنا به عن بعد يمشى وسط الجموع الغفيرة من الشباب ولكنه كان مميزا ظاهرا لا تخطئه العين, انه خالد . وبعد ذلك توافد علينا باقى القسم ( اللى عليهم الدور فى التقديم طبعا مش كل القسم) فجاء ابورابين وعامر.
انتظرنا ما يقرب من نصف الساعه حتى فتحت الابواب واذن لنا بالدخول الى هذه الثكنة العسكرية لبدء يوم طويل من الروتين الممل .
دخلنا وقسمونا الى مجموعات وقاموا بتصويرنا بالزى العسكرى( جاكت زيتى معفن كده) ثم قسمنا الى مجموعات , تبدأ من مجموعة 2 فيوم وحتى مجموعة 5 فيوم. وقع حظى فى مجموعة 3 فيوم , انا وعبد الغفار ورابين وقعنا فى هذه المجموعه وتفرقنا عن باقى الزملاء.
جاءت اللحظة الحاسمة : الكشف الطبى
كنت شغوفا لأن اعرف اذا كنت لائقا ام لا , وكما توقعت , كنت لائقا ليس فقط لأكون جندى مجند فى الجيش , ولكن أيضا لأكون ضابط احتياط , ولست وحدى بل كل الزملاء والاصدقاء والاخوة والاحباب ( تقريبا كده كل اللى راح فى اليوم ده اترشح ضابط احتياط) (ناعدا طبعا الرجاله بتوع اداب تاريخ اللى واكلينها والعه, يعنى هايدخلوا الجيش سنه واحده وكمان واخدين منهم 3 معيدين السنه دى)
اما البؤساء خريجى اداب انجليزى فتم ترشيحهم ضباط احتياط( يعنى لابسين جيش 3 سنين بالصلاة على النبى ومن غير مقاطعة)
يا جماعه احنا لسه امامنا اخر امل ( والامل فى ربنا كبير) الا وهو اننا ناخد تأجيل ( يعنى يوم الميلاد يا خد تأجيل) وهذا ما سوف نعرفه يوم الاربعاء القادم ان شاء الله
فإنى اسألكم الدعاء للغلابة دول اللى هايلبسوا 3 سنين ( وانا اولهم طبعا) واحنا فى ايام مفترجة ودعاء الصائم لا يرد ومستجاب ان شاء الله
نسألكم الدعاء بالتأجيل حتى لا نكون فعلا "مجموعة 3 فيوم"
العمل/الترفيه
المزاج
