خدعة العملاء ........في خدمتك يا فندم

خدعة العملاء ........في خدمتك يا فندم

سكريبت تليفونى

(شخص يطلب رقما عبر الموبايل)

صوت مسجل :- مرحبا بكم فى خدمة الكلفته فون الممتازة..اذا كان اتصالكم بخصوص خدمة العملاء اضغط الرقم واحد..
للاشتراك فى نظام سوبر حلويات اضغط الرقم واحد..
أما اذا كان اتصالكم بدون أى مناسبة فاضغط الرقم واحد...
الرجل :- هو كله واحد.. طب والله لأدوس تسعة(ويضغط تسعة)
صوت مسجل:- مرحبا بكم فى خدمة العملاء..من فضلك انتظر خمسة (جزء من أغنية الدنيا ريشة فى هوا)
الرجل:- لاء دا كتير أوى… أنا هقفل بقى وخلاص.
صوت حى :- (يظهر فجأة) لأ حضرتك ماتقفلش ..خدمة عملاء الكلفته فى خدمتك يا فندم.
الرجل:- لو سمحت أنا بتصل ع..
الصوت :- (يقاطعه) حضرتك سمعت أغنية الدنيا ريشة فى هوا ؟
الرجل: اه سمعتها .. أنا بتصل ع...
الصوت :- (يقاطعه) طب سمعت اغنية يا حلو صبح قبل كده ولا تحب تسمعها معنا ؟
الرجل:- ما سمعتهاش ومش عايز أسمعها؟
الصوت :- ترشح أنهى واحدة للتوب تن؟
الرجل:- مش عايز أرشح زفت.
الصوت :- ولا عايز تبعت اهداء.
الرجل:- ما تخلينيش أقطع الأتصال.
الصوت:- طب معلش هسألك أخرسؤال.
الرجل:- اتفضل خنقتني.
الصوت :- انت اخر مرة شحنت بكام.
الرجل:- بمية جنيه..اشمعنى؟
الصوت :- طب استلم بقى .
صوت مسجل:- عفوا لقد نفذ رصيدكم ..يرجى اعادة شحن البطاقة.

0(المشهد التانى)

(ابراهيم موظف جديد بخدمة العملاء مع المدير)

ابراهيم :- يا فندم بقول لحضرتك الشبكة بتاعتنا رديئة جدا والناس كلها بتشتكى.
المدير :- مين قال كده..أنا لسه مكلم واحد من الصين انهارده الصبح.
ابراهيم:- ازاى بقى..دا أنا أهوه واقف جنبك وبحاول أتصل بيك والنمرة مش راضية تجمع.
المدير :- هيا بالمسافة ...وبعدين دا عطل فني وموجود فى أى شبكة.
ابراهيم:- وكمان الرسايل مابتوصلش..يا راجل دى الجوابات بتوصل أسرع..والناس بتتصل وتشتم.
المدير:- احنا شعارنا فى الشركة.. "الشتيمة بتلف تلف وترجع للعميل".
ابراهيم:- بقول لحضرتك بيشتكوا.
المدير:-احنا شعارنا هنا برضه.."سيب العميل يشتكى ويبالغ..واسمع كلامه لو حتى كان فارغ".

خدعة العملاء ........في خدمتك فندم
منقول لايهاب دسوقي من جريدة الدستور

هههههههههههههههههه
حلو الموضوع يا برنسيس
على فكرة احنا انهم بيخدعونا
بس احنا سايبينهم بمزاجنا من كرم اخلاقنا يعنى

هههههههههههه
حلو الموضوع ده يا برنسيس والله ضحكتينى

هههههههههه والله هو ده الكلام اللي بيحصل فعلا

حمد الله علي السلامه صن شايننج
وحشتيني جدا ووحشتني مواضيعك وردودك
بس احنا هنفضل كرما لحد امتي ..للصبر حدود

شكرا وايت علي الرد والحمد لله ان الموضوع عجبك
اي خدعه..

شكرا ادمن بس هنعمل ايه ، سايبنهم بمزاجنا علي رأي صن..

بجد موضوع دمه خفيف وياريت نلاقى مواضيع زى كده كتير

لا والله الموضع جميل وضحكنى
واكتر حاجة ضحكتنى
الصوت :- انت اخر مرة شحنت بكام.
الرجل:- بمية جنيه..اشمعنى؟
الصوت :- طب استلم بقى .
صوت مسجل:- عفوا لقد نفذ رصيدكم ..يرجى اعادة شحن البطاقة.

قعد يتسهرا معاه لحد ما خلص له الرصيد
هههههههههههههههههههههههههههههه