لو كنت عصفورة.....

زائر

لو كنت عصفورة

كانت السما دى كلها هتبقى ملكى .. أنا لوحدى .. أطير وقت ما أحب ومكان ما أحب .. أغنى براحتى و أرقص براحتى ..

كنت هصاحب عصافير كتير .. نتفسح سوا و نطلع رحلات سوا ..
و لما نلعب استغماية .. كنت هادوخهم ورايا .. استخبى فى سحاباية .. و أخرج من سحاباية .. و أنزل أدًّارى ما بين فروع الشجر

و لما الدنيا تمطر، كنت هأخرج أرقص فى المطر .. و أبِّل نفسى .. أحوش المية فى جناحاتى و أطرطشها دواير فى الهوا

كنت هاخد بالى ما أقربش من الشمس .. و أعمل حسابى أسهر شويتين و أطلع أقعد مع القمر .. و نتفق نملى الكون نور و غُنا

كنت هصاحب فراشاية .. بجناحات ملونة .. أشيلها فوقى و نطير سوا ..

و لما أبرد أنزل أتدفى فى حضن وردتى .. كل الوردات تبقى صحباتى .. بس وردتى حاجة تانية ..أنا و هى متفقين فى كل حاجة .. لازم كنت هأعدى عليها كل يوم .. تحكيلى و أحكيلها .. نحكى حواديت لغاية ما عنينا تتاوب .. أبوسها و اطلع عشتى...

زائر

3la fekraaa begad topic koloooooooooo e7saaaaaaaaas
wallahe 7elw awyyy shaklk enty elly ktbah ya ammmola
3asl mooooooot .... merci ya bet