اولي حلقات برنامج "حكاوي القهاوي "

اهلا وسهلا بجميع اعضاء المنتدي الكرام ، ارحب بكم في اولي حلقات برنامجكم " حكاوي القهاوي " وحلقه اليوم سيقدمها لكم "مصطفي" نتمني ان تنال الحلقه اعجابكم ....

برنامج حكاوي القهاوي هو برنامج شكل تاني لأن الاعضاء هم من سيشاركون برأيهم في القضايا المطروحه ... وفي البدايه نرحب بجميع ضيوف هذه الحلقه

وفي هذه الحلقه سنناقش اهم المشكلات التي تواجه الشباب وكيفيه علاج تلك المشكلات ؟؟ لذلك نطلب من الساده الاعضاء الكرام اضافه تعليقاتهم حول المشكلات والصعوبات التي تقف امام الشباب وتعرقل طريقم للمستقبل ، كما نطلب من الاعضاء كيفيه التغلب عليها ...
وهل تري ان للشباب دور في المجتمع وانهم قادرون علي التغلب علي ظروف المجتمع ، ام ان ظروف المجتمع هي التي تحدد مستقبل الشباب ...

اولا يارب البرنامج يكون كويس ومفيد قولوا يا رب .اما عن المشكلات فهي ممكن تتقسم الي مشكلات ماديه ومشكلات ذاتيه بعني مشكله شغل وفلوس ومشكله الشخص ذاته وتكوينه الفكري والثقافي يعني نفسه ومؤهلاته وغلي فكره دي مشاكل المجتمع كله بشكل عام يعني الناس كله عندها مشاكل والله اعلم

زائر

شكرا Adminعلى الموضوع المهم ده وبجد انا شايفة ان من اهم المشاكل اللى بتقابل الشباب هى الفراغ اللى بيوديهم لطرق بتبقى مسدودة وكوارث مالهاش عدد

هي فعلا مشكله كبيره بس انا شايف اننا نقول المشاكل بنظره شموليه وبعدين ننقي مشاكل وشكرا يا جهاد

زائر

مرسي يا admin على الموضوع الجميل دا ....بس لو هنتكلم عن المشاكل فأظن انى فى مشاكل كتير اوى واى : البطالة ...الفراغ...الصحبة السيئة...انععدم الاخلاق ...تطلعاتهم فى ظل انعدام القدرة على تحقيق ما يحلمون به..و حاجات تانية كتير جدا ...

زائر

بس انا شايفة ان دى مشكله مش صغيرة ان لو دورت هتلاقى ان معظم المشاكل وراها الفراغ والبطاله

hey , what's up , ! 6october to7ayykom

hey'what's up ' 6 october to7hyyecom

اولا الموضوع ده مهم جدا وحيوى وفكرة البرنامج جامده جدا وشكرا ليكم جميعا على الشغل الجامد ده, بس اكيد من المشاكل اللى بتواجهنا كشباب البطاله ) وللا ايه يا خالد)

بما اننا جميعا متفقين علي ان البطاله من اهم المشكلات التي بتواجه الشباب يا تري ايه السبب في هذه المشكله وما هي اقتراحاتكم لحل مشكله البطاله ؟؟

يعنى يا مصطفى اولا الواحد لازم يؤهل نفسه لمتطلبات سوق العمل وبعدين يشتغل , مش يروح يدور على شغل وهو اصلا مش مؤهل , وللا ايه رأيكم؟؟؟؟؟

بص يا معلم حكايه ان فيه مناخ مناسب طبعا لأ بس احنا عندنا الشباب اللي يقدر يبدع في أي وقت وأي مكان بس احنا نديهم الشعور ده ونقدر نلاحظ ده مثلا نجيب محفوظ نجح وهو في مصر واتغلب علي المناخ الزفت ده وفيه مثال تاني وهو الدكتور خالد عوده استاذ الجولوجيا في اسيوط نتيجه مجهوده مصر قربت تدخل ضمن افضل 500 جامعه ف العالم واتسجلت بأسمه الكتير من القوانين الجوليجيه والمجلس الجولوجي العالمي كان حي مصر السنه اللس فاتت بس للاسف رجع من المطار لأن الدكتور حالد كان مسجون قال ايه لأنه من الاخوان وقالوا اننا مبنحترمش العلم ولا العلماء شوفتوا المسخره احنا مش بس موفرناش المجال احنا بنحارب الناجحين بس نقدر ننجح في أي وضع لأن أحنا فراعنه

زائر

انا متفقة مع رأى عمرو ان الواحد لازم يأهل نفسه بس مثلا لو حد خريج جديد و راح اتقدم لوظيفة طالبة على الاقل خبرة 3 سنين ....هيجبوها منين يعنى ....يعنى المشكلة مش فينا ...اه ممكن تكون اسباب المشكلة ان فى شباب و زيادة سكانية بشعة ...بس ممكن رجال الاعمال يفتحوا فرصة للشباب حديث الخريجين .....ان الشباب ميقتصرش تفكيرهم على الوظيفة يعنى يحالوا يفكروا ف مشاريع اه هتبقى صعبة للظروف المالية بس لو مجموعة شباب اتفقوا على مشروع و ممكن يعملوا قرض من البنوك ....

زائر

اعتقد ان من اهم اسباب البطاله هى الحاله الاقتصاديه والكلام ده طول عمره موجود فى مصر من قبل اى ازمات اقتصاديه فى العالم والتدهور الاقتصادى اللى فى مصر سببه الحكوووووووومة وفعلا يا عمرو عندك حق ان الشاب او البنت لازم يكون مؤهل بس فى كتير مؤهلين وقاعدين فى البيت برضه, بجد انا شايفة ان رجال الاعمال فى مصر زى قلتهم ,اكيد فى ناس كويسين بس قليلين جدا وكل رجال الاعمال الكبار شغلتهم السرقة رغم انهم مستكفيين,ليه رجال الاعمال دول مايفتحوش مصانع ومشاريع ويشغلوا الشباب و ده اكيد برضه هيرجع عليهم بفائد لان مفيش حاجة ببلاش

فى البداية انا بحييك يا درش على النيولوك للجديد للمنتدى بجد بقى حاجة روعة، اما بالنسبة لمشكلة البطالة فاكيد هى ممشكلة كبيرة جدا ن بس انا مقتنع بحاجة ان الانسان منا لو حاول وخد بالاسباب ودور كويس على شغل ، وياحبذا لو الشغل دا يتوافق مع امكانياته اكيد هيقدر يعمل حاجات كويسة ، اما ان الشباب بقى تقعد على القهوة طول اليوم ويقضوها شاى ودومنة ويقولك مفيش شغل ، فدا العيب ، انا بتفق مع عاشق انالناس اللى ماسكة البلد هى اللى حطانا كشباب فى الظروف دى ، بس لكللا مجتهد نصيب ، فعلى سبيل المثال انا شغال هنا فى اكتوبر من اسبوعين وعلى فكرة انا مرتبى بيصل فيها لالف جنيه ، بس على فكرة يا جماعة انا قعدت حوالى اسبوع لحد ورحت شركات تانية زى هاينز وايجيبت تريد بس الشغل فيها معجبنيش لحد ما اشتغلت فى المكان اللى انا فيه دلوقت ، اللى انا عايز اوصله لكل الاعضاء ان لازم انزل واتعب شوية وما اياسشى بسرعة لازم اى حد عايز يشتغل خاصة لو شغلانة محترمة يكون باله طويل ويكون عنده الدافع ، معلهش يا جماعة انا اسف طولت عليكم فى الرد.

سؤالي الثاني الي الاستاذه جهاد ... لو كنتي مسئوله كبيره في الدوله ما هي خططك للحد من مشكله البطاله ؟

فعلا يا جماعه انتو عندكم حق بس احنا نعمل اللى علينا الاول علشان ربنا يكرمنا , وبالنسبه للحاله الاقتصاديه بقى ربنا يسهل بمعجزه كده وللا حاجه بس احنا ممكن نسافر بقى احسن

انا مختلف معاكم شويه يعني مفيش مشكله سكانيه بالعكس السكان نقطه قوه مش ضعف يعني هما اهم حاجه لأنهم اللي بيقودو الحياه ووظيفه الحكومات انها تؤهلهم للعمل زي الصين واليبان اللي 180مليون وبدءواالنهضه معانه وفي نفس السنه وبعدين مين رجال الاعمال دول دول الحكومه وهما اللي في اديهم الشغل ولما نطالب يبقي الحكومه لانها حكومه رجال اعمال وزير النقل عنده اكبر شركات سيارات ووزير السياحه عنده اكبر شركات سياحه وهكذا لحد منصل لابن العز وقولوا يا رب

زائر

السفر؟؟!!! فى الحالة دى يعتبر هروب الى حد ما ...اصل كدا كدا الشباب بيسافروا و يتمرمطوا برا ...مش كل المسافرين ...فى ناس بتسافر و معاها عقد شغل مضمون ...بس اللى بيسافروا لمجرد السفر و خلاص بره البلد و يقولوا بكرا لما نسافر هنلاقي هناك شغل ..مع انه بيدبهل برا اكتر من بلده لأ و كمان فيهم اللى بيشتغل شغل مش مظبوط بقى و الباقى معروف ...و فى الآخر بيرجع بلده مجرم ...دى طبعا مش نظرية عامة لكل الناس بس بتحصل لناس كتير

انت قلقان من ايه يا عمرو انت تشد حيلك ف 6 اكتوبر وتجهز فلوس الفيزه وملكش دعوه مش هنعاملك زي الغريب 25 الف بس وانا مكارمك ع الاخر

زائر

طب يا عامر انت بردك كدا بصراحة مبقاش فى اى امل للبطالة انها تقل ف البلد ....يعنى نعمل ايه طيب ؟

زائر

اولا هقضى على رؤوس الفساد مهما كانت العواقب واسمحلى اختار منصب كبير شويه علشان انفذ اللى انا عايزاه ,يعنى ممكن ارجع التكليف للدكاترة والصايدله علشان دول بجد حرام بعد التعب والدراسه و العلم اللى وصلوا ليه يقعدوا فى بيوتهم ,هلغى الواسطة علشان اى حد مهما كان يقدر يشتغل من غير مايحس بالذل وان البلد دى بلد منصب وسلطة ,هدى لكل شاب قرض محترم يقدر يبدأ بيه حياته من غير مايتبهدل بعد التخرج ,هعمل كورسات فى كل اللغات وعلى اعلى مستوى على حساب الدوله علشان يبقى الشباب على مستوى عالى ويقدر يواكب التطور العالمى واكيد فى حلول تانيه كتير بس ده هيبقى من اولوياتى

صلي علي النبي .تمام كده .طالما هما عجزه وملهمش الا في السرقه يبقي احنا اللي نختار اللي يحكمنا .فيه حل جميل جدا يا أمل 0منظمه الشفافيه الدوليه بتقول ان مصر أكبر دوله بتتسرق في العالم يعني حوالي 300مليار منهوب في السنه ايه رأيكم مش لو كانوا موجودين مكنوش يحلوا كل المشاكل مش البطاله بس

زائر

اقتباس :: منظمه الشفافيه الدوليه بتقول ان مصر أكبر دوله بتتسرق في العالم يعني حوالي 300مليار منهوب في السنه ايه رأيكم مش لو كانوا موجودين مكنوش يحلوا كل المشاكل مش البطاله بس

اوك دا لو كنا نقدر نمنع السرقة بس مأظنش ان فى حد منا يقدر يقول لا ...لان اللى هيقول لأ مش هيستنى كتير ف البلد و دى حاجة معروفة ...بلاش نفكر انننا بنتسرق مع ان دا واقع ...طب ممكن نعمل ايه حلول تانية نحاول نستفيد باللى ف ايدينا ..مدام مش ف ايدينا اننا نحاربهم؟؟؟

ازيك يا عامر ، لو سمحت يا عامر يا ريت تحاول معانا على حلول وسيبك بقى من اللغة اللى انت بتستخدمها دى لان انا لو هعمل بكلامك يبقى هفر من البلد او هقعد فى البيت ، مع ان انا مش مقتنع ان البطالة موجودة بالصورة اللى انت راسمها يا عاشق ، وعلى فكرة يا شباب حاليا فى مدينة السادات الشغل والوظائف للى عايز يشتغل مفيش اكتر منه وبمرتبات مجزية جدا وكمان بسكن للمغتربين ، بس فيه ناس بتكلم على الفاضى والمليان ولما تيجى تنزل للشغل بيقولك اصل المنطقة مش عمار اصل انا عايز ابوس بابا وماما قبل ما انام طب يا حبيبى يبقى خلى ابوك وامك يعيشولك ويبقولك .

» الحلقة الثانية من برنامج "حكاوى القهاوى"
» ""رمضان يا شهر الضياء""
» "قصة رائعه يرويها الشيخ الجليل محمد متولى الشعراوى "
» "العالم العربى" للشاعر العظيم عبد الرحمن الابنودى
» كـــل...شـــىء...عــــن...ليلـــة..."المحـــور"... القـــدر...