الجلسه الرابعة من كرسى الاعتراف

اهلا اهلا اهلا بيكي ياموللي ع الكرسي الجامد دة
بس متقعديش علية جامد علشان الوردة كدة تموت
حرااااااااام كفاية انتي هتموتي من اسألتنا
انا عايزة اسألك كام سؤال بقي ممكن ؟..اكيد ممكن
********************

*تعريف الامل بنسبة ليكي اية؟

*اسعد وقت ف حياتك بيبقي امتي؟

*لو اضطريتي انك تختاري فيما بعد بين شغلك ......وبيتك تختاري اية ؟ ولية؟

*زى ما سألتك اسعد وقت ف حياتك ! احب اسأليك اتعس وقت ف حياتك؟

*اوحش موقف اتعرضتي لية امتي ؟ وكان اية الموقف لو كان ممكن؟

*اكتر حد بينسيكي همومك؟

*اجمل يوم قضيتية مع اصحابك فكراة ؟ وقضيتية ازاي ؟ وفين؟

*اية الهواية اللي ممكن تعمليها لو زعلانة ؟او فرحانة؟

*مفهوم التضحية بنسبة ليكي؟

*احلي مرحلة كانت ف حياتك
الطفولة .....الشباب؟ولية؟

كترت عليكي شوية يامل بس
مش مهم
يلا جوبي ياقمر

اولا:طبعا مرسي على الاستضافة الجميلة دى يا جو و كمان على الكرسي العجيب دا بس جميل بجد ...و بصراحة العصير جه فى وقته
ثانيا نبدا بقي الاجابة و امرنا لله ....بس طبعا منك لله على الاسئلة الكتيرة دى كلها اروح منك فين يعنى :-

ماهي أفضل طريقة للتعبير عما بداخلك؟
بصي يا ستى اعبر عن اللى جوايا ساعات بيكون بالكلام للى قدامى بس ساعات مبعرفش اعبر عن اللى جوايا بالكلام فا بيكون بالتصرف للى قدامى عشان يفهم انا عايزة اقول ايه ....بس لو فشلت خالص بقي ...بسكت...بس لو لوحدى بقي يا ما بقعد ارسم اى حاجةممكن تعبر عن اللى جوايا.

مــاهي أكبــر خساره ممكن أن تخسريها في حياتك ؟
خسارة اى حد غالى عندى و بحبه


)هل الثقة بالنفس غرور وتكبر؟
لا طبعا خالص عمر ما كانت الثقة بالنفس غرور بس لو بحدود ...يعنى لو زادت اوى عن حدها اكيد بتتقلب لغرور...و ربنا يا رب ميجعلناش من المغرورين ابدا



لماذا كل شىء نحبه نتوقع فقدانه؟
لان كل حاجة لازم يكون ليها اخر و تخلص حتى الحياة بنقارقها و تخلص فى الاخر


أهم ظاهرة اجتماعية تتمنى أن تزول من مجتمعنا؟
الخيانة...لان كل حاجة بقت فى الدنيا مرتبطة بالخيانة...خيانة ضمير خيانة مبادئ...خيانة صديق ...خيانة اهل و غيره كتير كل حاجة غلط بقت مرتبطة بالخيانة لنفسنا و لدينا

هل تفضلين الحقيقة القاسية ام الكذب الجميل؟
اكيد طبعا من غير كلام الحقيقة القاسية مهما كانت لان الحقيقة بتريح كتير و كدا كدا الحق بيظهر فى الاخر .

)ماهو الخوف؟
الخوف بيكون يا ايما ...((خوف من))..او ..((خوف على))...و اكيد طبعا كلنا بنخاف من ربنا بس خوف المحبين له و على رضاه علينا...و بنخاف من الموت بس اظن مفيش حاجة تانية ممكن نخاف منها بعد كدا

و طبعا كلنا بنخاف على نفسنا و بنخاف على اهلنا و الناس اللى بنحبهم ...من رأيي الخوف شعور جواكى بحس انه مرتبط باحساس الحب سواء لربنا او لحد غالى عندنا.

لصراحة والوقاحة رايك فيهم ايه؟
طبعا فى فرق بين الصراحة و الوقاحة...الصراحة انى اقولك رأيي فى حاجة من غير مجاملة بس بأسلوب مهذب و منسق مع مراعاه للشخص اللى قدامى ...اما الوقاحة فانى اقولك رايي بمنتهى السخافة من غير مراعاه للاسلوب او للشخص اللى قدامى....بس هو فى نقطة دا بيتوقف برضه على حسب الشخصية اللى قدامى يعنى ممكن اكون بتكلم بالطريقة الصح و باسلوب كويس بس الشخصية نفسها مش متقبلة كلامى و تعتبر دا نوع من الوقاحة ..

كيف تتعامل مع الانسان العنيد؟
اى انسان مهما كان عنيد بالمعاملة الطيبة و اللين زى ما بيقولوا و الاقناع بالطريقة الصح بيجيب نتيجة ...بس المهم تعرفى تقنعيه صح ازاى لان ممكن تستخدمى او تقولى حاجة غلط تخليه يعند اكتر ...بس برضه انا معترفة ان اى شخصية مهما كانت لو اخدتيها بالراحة و بحب كدا هتبقي كويسة و تعرفى تملكى زمام الامور كويس...

من يستحق ان يرى او يمسح دمعتك ؟
امى و اصحابي المقربين اوى اوى اوى

ايه مفهوم الغيرة بالنسبه ليكى؟
الغيرة احساس جميل بس لو الغيرة المعقولة...و كمان لو بمعنى ..(((الغيرة على)))...مش (((الغيرة من)))...يعنى اغير على حد بحبه .....اغير على دينى ...و طبعا الغيرة المظبوطة مش الغيرة القاتلة ....لكن ((الغيرة من)) ساعات بتبقى حافز ان الانسان يبقى احسن و احسن بس لو كترت اوى و زادت عن حدها هتبقي حقد و غل ..

من هو قدوتك فى الحياة؟
بـــــــابــا

اعطى لقب لكل عضو من اعضاء المنتدى حسب قائمة افضل عشر اعضاء؟

عاشق الحرية الشاعر المشاغب

جهاد روح المنتدى

الادمين امبراطور المنتدى

عمرو الدبلوماسي

هيام المبدعة

سالي فاكهة المنتدى

knight حكيم المنتدى

رنا وردة المنتدى

lost( محمود) بجد اخويا الصغير ف المنتدى

شعورك ايه وانتى قاعدة ومستريحه على الكرسى ؟
شعور جميل و غريب فى نفس الوقت ....شعور بالقلق من باقى الاسئلة و بس برضه سعيدة انى معاكم و يا رب اكون ضيفة خفيفة على الكرسي

اقتباس :

انا عايزة اسألك كام سؤال بقي ممكن ؟..اكيد ممكن

بما انك رديتى على نفسك حتى مفيش فرصة انى ارفض ....بس اولا لازم افكرك اان كل واحد ليه يوم و لما تكونى انتى مكانى هطلع عينك فى الاسئلة ان شاء الله..

*تعريف الامل بنسبة ليكي اية؟
الامل هو شعور بالحياة و جمال الحياة ...الامل بيدينا طاقة نكمل حياتنا ..املنا ان الحياة تبقى احسن ...املنا اننا نغير من نفسنا دايما للاحسن...الامل هو الايمان بكل حاجة جميلة ...هو الحاجة اللى بيتساعدنا على نسيان اى حاجة سلبية مرت علينا ...

اسعد وقت ف حياتك بيبقي امتي؟
اسعد وقت فى حياتى لما بكون مع عائلتى و اهلى كلنا مجتمعين فى اى مناسبة سعيدة...و طبعا لما بكون مع اصحابي اللى بحبهم و بنقضي وقت جميل.


لو اضطريتي انك تختاري فيما بعد بين شغلك ......وبيتك تختاري اية ؟ ولية؟
اكيد طبعا من غير كلام بيتى ...اصلا البيت و الاهتمام بالعائلة هى دى الرسالة الحقيقة اللى ربنا طلبها منا و طبعا الاولى ف الحياة بيتى و عائلتى.

زى ما سألتك اسعد وقت ف حياتك ! احب اسأليك اتعس وقت ف حياتك؟
لما يكون اى حد فى عائلتى و اهلى و اصحابي زعلان او فى مشكلة و انا مش قادرة اساعده اظن ان دا فعلا بيكون اتعس وقت قى حياة اى انسان.

اوحش موقف اتعرضتي لية امتي ؟ وكان اية الموقف لو كان ممكن؟
بجد مش فاكرة اى موقف وحش عدى عليا و لسه فاكراه

اكتر حد بينسيكي همومك؟
اى حد بحبه و غالى عندى لما بكلم معاه بهدى و ممكن انسي كل همومى

اجمل يوم قضيتية مع اصحابك فكراة ؟ وقضيتية ازاي ؟ وفين؟
كل يوم بقضيه مع اصحابي و كلنا متجمعين بيكون اجمل يوم فى حياتى .

اية الهواية اللي ممكن تعمليها لو زعلانة ؟او فرحانة؟
بصي هى مش هواية اوى يعنى بس يا اما بسمع اغانى او امسك ورقة و قلم و اقعد ارسم اى حاجة و ساعات يعنى بقعد اقرأ اى كتاب شعر.

مفهوم التضحية بنسبة ليكي؟
التضحية احلى حاجة فى الدنياهى الوفاء والإخلاص والصدق في المعاملة و انك تتنازلى عن حاجة بكل رضا و حب بس لما تكون من اجل حد يستاهل و يقدر التضحية دى

احلي مرحلة كانت ف حياتك الطفولة .....الشباب؟ولية؟
بصي هى كل مرحلة و ليها حلاوتها ...يعنى الحمد لله الواحد عاش طفولة سعيدة الى حد ما و برضه اهو بيعيش شباب سعيد الى الآن يعنى مدام معاه اصحاب زى العسل زيكم كدا ...بس هو فى حاجة انا لسه عايشة شوية بروح طفولة بس بشوية من عقل و رزانة مرحلة الشباب...يعنى مبقفلش على نفسي و اقول لا خلاص انا كبرت ....صحيح انا كبرت بعقلى و سنى و بقيت مسؤله عن تصرفاتى بس برضه لسه فى شوية طفولة فى الروح.

اولا: طبعا مرسي على مشاركتك .

ثانيا: الحزب الوطني

بصراحة انا مش عارفة كتير اوى عن الحزب الوطنى بس يعنى هقولى رأيي على قد معرفتى بيه...بس اولا: طبعا هو اسمه الحزب الوطنى الديمقراطى ...((و طبعا بيشمل فكر جديد)))...سيبنا من كلمة الديقراطية لان لو هنتكلم عنها يبقى هنقول كتير و ساعتها هنهين الديمقراطية ...و طبعا سيبنا من فكر جديد ...طبعا انا لا شايفة فكر جديد و لا فكر قديم لان اظن ان مفيش فكر اصلا او يمكن احنا اللى مش فاهمين ...لا و فى شعار جميل اوى برضه بتاع الحزب الوطنى فى مصلحتك بصراحة انا معجبة جدا بالشعار دا و طبعا واضح جدا انه فى مصلحتنا و الدليل على كدا امشي فى الشارع و بص بس فى وجوه المصريين تجدها مليئة بالسعادة و الفرح متلقيش حد شايل الهم ولا بيفكر هيعمل ايه ف بكرا و لا حاجة خالص يعنى فعلا الحزب دا عمل شوية انجازات فى الدولة و للشعب يعجز االواحد حصرها ...و مش هننسي طبعا شعار..(((بلدنا بتتقدم بينا))...هى فعلا بلدهم مش بلدنا لما يبقوا مش شايفين الا شريحة واحدة بس من المجتمع و ناسيين باقى المجتمع يبقى فعلا بلدهم ...لما يبقى معظم اللى فى الحزب رجال اعمال و تجار يعنى ملهومش اى علاقة بالسياسة لا هما باحثين سياسيين و منهم من لا يفقه شيئا فى السياسة غير سياسة الكسب من وراه ازاى يبقى لازم تكون بلدهم مش بلدنا...دا من وجهة نظرى اصلي معرفش حاجة عنه الا من خلال شعاراته بس مش لاقية ليه اى أثر فعلى فى البلد ...

.الحلم .

اقتباس :

Without leaps of imagination, or dreaming, we lose the excitement of possibilities. Dreaming, after all, is a form of planning

.

الجملة دى بالنسبة ليا بتجسد معنى الحلم ...الحلم هو الدافع اللى بيخلينا نكمل ....الحلم هو احنا عايزين بكرا يبقى عامل ازاى ...الحلم هو الحاجة اللى عايزين نوصلها بس بعيدة اوى عننا ...و طبعا مش كل الاحلام بتحقق ...بس يكفى احساس انك حلمت اظن ان دا فى حد ذاته دافع عشان تحاول توصل للى عايزه الحلم حتى لو موصلتش بس شرف التجربة يكفى ...الحلم هو النور اللى بنقابله فى لحظة يأس...و بيكون طوق نجاة فى اوقات كتير لما تفقد ايمانك بنفسك او بالاخرين بترجع تحلم و تقول لا انا بكرا هبقى كدا و هحقق اللى انا عايزه ...من الاخر الحلم و الحياة مرتبطين ببعض لان يوم ما اى حد هيبطل يحلم يمكن ميقدرش يعيش ...بالنسبة لناس كتير ممكن يكون الحلم هو الطموح يعنى ناس بتقول انا مش بحلم بس بطمح ابقي كذا ..طب ماهو دا دا برضه شكل من اشكال الحلم ..يعنى كل واحد ليه حلم (الطموح) فى الحياة و بيسعى انه يحققه.

شايفه بكره زاي
(( اكيد بكرا هيبقى اجمل بكتير من النهاردة )) بسمع الجملة دى كتير اوى و بقول يارب فعلا بكرا يكون احسن من النهاردة و الدنيا كلها تبقي احسن بس ساعات بتعب من التفكير و بسيبها بظروفها كدا كدا المكتوب هنشوفه اذا كان وحش ولا حلو ...بس برضه الواحد عنده امل ان الامور تتغير و يبقى فى ايجابيات ملموسة و كل المشكلات اللى موجودة تخلص و تتحل و كل الحروب تنتهى و نعيش ف سلام ..مش عارف اقولكم على حاجة سيبوها لظروفها احسن ....

التفائل والتشائم
هو انا من وجهة نظرى ان التفاؤل و التشاؤم حالة مزاجية لكل شخص ...لو حد بيكون سعيد و مستقر نفسيا بيكون متفائل و شايف الدنيا جميلة ...بس لو متضايق او زعلان من حاجة بيكون متشائم و حاسس ان كل حاجة ضدده ...بس لا التشاؤم ولا التفاؤل ليهم وجود حقيقى فى حيايتنا يعنى مثلا تلاقى ح يقول انا بتشائم من الرقم 13 بتشائم من القطة السودا ...لا وبتفائل بالشخص الفلانى و اليوم باليوم كذا ...اظن ان دا ملوش علاقة بالواقع خالص ..اصل الدنيا دى قدر مكتوب لنا نعيشه بحلوه او مره مش الرقم المعين دا اللى هيبوظ يومنا ولا اليوم اللى كذا اللى هبقى فيه سعيدة وو باقى الايام هبقي عايشة فى نكد ..بس يمكن يكون دى شماعة بنعلق عليها احساس جوانا مش لاقيين له تعريف ....

مرسي ليك على المجاملة الجميلة دى و شكرا جدا

اولا: طبعا مرسي على اشتراكك يا عمرو و متنساش خلاص دورك المفروض بكرا ان شاء الله ...بس قولنا بقي هتكون فاضي امتى

ثانيا : امتى مره حسيتى بالظلم ؟ وازاى كان تصرفك ؟

الظم يااااااااه كلمة صعبة اوى بجد و ليها تاثير صعب اوى على النفس ... هو انا لحد ما مش حسيت بالظلم القوى فى حياتى ...يمكن نسبة الظلم الطبيعية اللى ف حياة اى انسان ..مثلا ظلم فى الدراسة.. ظلم ان حد فهم حاجة غلط ...الحاجت الطبيعية اللى بتحصل يعنى .بس الظلم بمعناه القهر مظنش انه حصل الحمد لله يعنى..بس اظن انه لو حصل مش هسكت لا هفضل ادافع عن نفسي و حقى لحد ما اخد حقي طبعا حتى ولو بعد سنين المهم انى احاول على الاقل...بس هو فى نوع من الظلم احنا اللى ممكن نسببه لنفسنا و هو ..(((ظلم النفس)) بس بجد هو دا اشد انواع الظم فى رأيي ..و اظن ان دا برضه اصعب احساس ممكن نحاول التغلب عليه ..

وهل تقدرى فى يوم من الايام انك تظلمى حد او حتى تكونى سبب فى ظلمه مهما كانت الاسباب؟؟؟؟
انا عمرى ما هقدر انى اكون سبب فى ظلم انسان ...و ربنا ميجعلنا من الظالمين ابدا....و زى ما بيقولوا يا بخت من بات مظلوم و مبتش ظالم ....و لو دا حصل لا قدر الله هحاول انى اشيل عنه الظلم دا حتى لو كنت انا هتاذى ....